Inspektorati Policor të Kosovës (IPK), ka njoftuar se gjatë vitit të kaluar, janë kryer 213 hetime në drejtim të punonjësve të Policisë së Kosovës, ku prej tyre janë arrestuar 38, suspenduar 85 dhe janë transferuar 10.

IPK me anë  të një komunikate për media ka bërë të ditur se gjatë vitit 2021, ka hetuar 33 raste të veprave penale me elemente të korrupsionit dhe vepra të tjera kundër detyrës zyrtare, transmeton arbresh.info.

“IPK gjatë vitit 2021 ka pranuar dhe ka menaxhuar me 2013 ankesa dhe informata që në krahasim me vitin e kaluar ka një ngritje të numrit të ankuesve (vitin e kaluar IPK ka trajtuar 1658 ankesa). Prej tyre 1331 ankesa që janë klasifikuar si shkelje disiplinore e profilit të ultë janë përcjellë për t’u trajtuar në Drejtorinë për hetime të brendshme dhe verifikim të së kaluarës në Policinë e Kosovës. Nga 163 raste me elemente të veprës penale, 106 janë dërguar me kallëzim penal nga Departamenti i Hetimeve në prokuroritë kompetente, ndërkaq me raport të veçantë janë dërguar 54 raste. Gjithsej gjatë vitit 2021 si subjekt i hetimit nga IPK-ja kanë qenë 213 punonjës të PK-së. E shprehur në përqindje i bie që vetëm 2.3% e punonjësve të PK-së janë hetuar nga IPK-ja me dyshimin se kanë kryer vepra penale. Gjatë vitit 2021, IPK-ja ka ndërmarrë këto masa dhe rekomandime 38 arrestime; 85 suspendime dhe 10 transfere. Këtë vit IPK-ja ka hetuar 33 raste të veprave penale me elemente të korrupsionit dhe veprave tjera kundër detyrës zyrtare”, thuhet në njoftim

Sipas komunikatës, Divizioni i Inspektimit dhe Raportimit në kuadër të Departamentit të Inspektimit në drejtim të vlerësimit të kryerjes së detyrave policore në raport me legjislacionin dhe standardet e kërkuara, gjatë vitit 2021 ka realizuar nëntë inspektime, nga të cilat, katër të rregullta bazuar në planin vjetor të inspektimit dhe pesë të jashtëzakonshme.

“Gjatë vitit 2021 janë realizuar këto inspektime: Menaxhimi i patrullimeve dhe sigurisë në rrugë (inspektim i rregullt); Monitorimi i besueshmërisë dhe kënaqshmërisë së publikut me Policinë e Kosovës (inspektim i rregullt);Menaxhimi i hetimit dhe zbulimit të krimit (inspektim i rregullt); Trajtimi i personave të ndaluar përkohësisht në Stacionin Policor të Ferizajt (inspektim i jashtëzakonshëm); Vlerësimi i performancës së stacioneve policore në Obiliq, Podujevë dhe Skenderaj (inspektim i jashtëzakonshëm); Menaxhimi, funksionimi dhe aktivitetet hetimore të Drejtorisë së Hetimit të Krimeve Ekonomike dhe Korrupsionit (inspektim i jashtëzakonshëm); Kryerja e detyrave gjatë trajtimit policor të rasteve të dhunës në familje (inspektim i jashtëzakonshëm); Vlerësimi i performancës policore në realizimin e urdhëresave të gjykatave (inspektim i jashtëzakonshëm)”, njofton IPK.

Mes tjerash thuhet se gjatë këtij viti, IPK-ja ka pasur një mori aktivitetesh nën vazhdën e përpjekjeve për të ndërtuar marrëdhënie të qëndrueshme me qytetarë dhe partnerë të ndryshëm, me organizata qeveritare e jo qeveritare dhe me media. / arbresh.info/