Shefi i diplomacisë së Kosovës, Behgjet Pacolli, ka shprehur bindjen se përfaqësimi diplomatik i Kosovës në Kostarikë, i rëndësishëm për prezencën tonë në Amerikën Latine.

“Përfaqësimi diplomatik i Republikës së Kosovës në Kostarikë është një rezultat i rëndësishëm i punës dhe përkushtimit të vazhdueshëm, që t’i rihapim dyert e të forcojmë marrëdhëniet me shtetet që e kanë njohur Kosovën, ndërkohë që të lobojmë fuqishëm tek ato jo-njohëse nëpërmjet ndërtimit të miqësive të reja”, ka thënë Pacolli, teksa ka shtuar se kjo do të mund të arrihej nëpërmjet një prezence të shtuar diplomatike të Kosovës gjithandej nëpër botë dhe me një diplomaci praktike, gjë e cila, sipas tij, edhe po ndodhë.

Pacolli ka akredituar ambasadoren e Republikës së Kosovës në Panama, Zana Rudin, si ambasadore jo rezidente edhe në shtetin e Kostarikës.

Ambasadorja Rudi, të premten më 13 Prill, i dorëzoi letrat kredenciale presidentit në detyrë të Kostarikës, Helio Fallas Venegas, si dhe ministrit të Punëve të Jashtme të këtij shteti, Manuel Antonio Gonzalez Sanz.

Kostarika e kishte njohur Pavarësinë e Republikës së Kosovës në ditën e njëjtë që ajo ishte shpallur, më 17 Shkurt, 2008, ndërkohë që marrëdhëniet në mes dy vendeve kanë shënuar ngritje të vazhdueshme që nga atëherë.