Dymbëdhjetë dhoma po bënë gati Gjykata Speciale për të akuzuarit e ish-eprorëve të Ushtrisë Çlirimtare të Kosovës, raporton portali arbresh.info.

“Deri të hënën do të transferohen në Hagë 12 ish-eprorë të UÇK-së”, bëjnë të ditura burime të arbresh.info brenda Speciales.

Gjykata Speciale ka konfirmuar akuza për ish-presidentin, Hashim Thaçi, ish-kryetarët e Kuvendit, Kadri Veseli e Jakup Krasniqi, dhe ish-deputetin e Vetëvendosjes, Rexhep Selimi.

Të gjithë këta ishin eprorë të luftës për çlirimin e Kosovës.

Derisa Krasniqi u bastis dhe arrestua nga Misioni i BE-së për Sundim të Ligjit në Kosovës, EULEX, Selimi, Veseli e Thaçi u lajmëruan vetë në zyrat e EULEX-it.

Në një konferencë për media në Prishtinë, Thaçi para mesditës tha se është njoftuar zyrtarisht për konfirmimin e aktakuzës.

Sipas Thaçit, aktakuza ndaj tij dhe eksponentëve të tjerë të ish-Ushtrisë Çlirimtare të Kosovës, “është çmim i vogël, i radhës që kërkohet të paguajmë për lirinë e vendit dhe popullit tonë”.

Kurse ish kryetari i Kuvendit, Kadri Veseli tha se akuzave u duhet dhënë përgjigja përmes fakteve të së vërtetës.

“Edhe nëse ka akuza të bëra kundër nesh, atyre ju duhet dhënë përgjigja në mënyrën e duhur, me faktet e së vërtetës.  Unë këtë jam duke e bërë”, tha mes tjerash.

Përkrahje e madhe është shprehur nga përfaqësues të institucioneve e shumë qytetarë me besimin se “liria ka emrin UÇK”, fushatë e lansuar së fundmi në përkrahje të atyre që të gjithë jetën ja kushtuan luftës për liri dhe pavarësi./arbresh.info/