Pas shumë dështimeve për të siguruar praninë e tyre në sallën e gjykimit, Gjykata Themelore në Prishtinë e ka caktuar seancën e radhës ndaj katër deputetëve të Lëvizjes “Vetëvendosje”, Albin Kurti, Donika Kadaj-Bujupi, Albulena Haxhiu dhe Faton Topalli.

Kjo seancë është caktuar të mbahet, të premten, më 1 dhjetor.

Caktimin e kësaj date, e ka konfirmuar për “Betimi për Drejtësi”, procesmbajtësja e gjykatësit Beqir Kalludra, Mybera Latifi.

Ndryshe, Policia e Kosovës, të premten e javës së kaluar, kishte arrestuar tre deputetët e Lëvizjes “Vetëvendosje”, Albin Kurtin, Donika Kadaj – Bujupin dhe Albulena Haxhiun.

Arrestimi i tyre ishte bërë me udhër të Gjykatës Themelore në Prishtinë, e cila kishte lëshuar udhërarrest ndaj tyre, pasi që të njëjtit nuk kishin shkuar në seancën e 22 nëntorit, në gjykimin për hedhjen e gazit lotsjellës në Kuvendin e Kosovës.

Për arrestimin e tyre, Policia e Kosovës ishte dashur të përdorë edhe sprejin pasi që kolegët e këtyre deputetëve ishin munduar të mos e lejojnë arrestimin e Kurtit, Kadaj – Bujupit dhe Haxhiut.

Arrestimi i tre deputetëve ishte bërë në hapësirën e jashtme të Kuvendit të Kosovës, derisa po planifikohej të vazhdonte seanca plenare e legjislativit të vendit.

Pas arrestimit, Gjykata Themelore në Prishtinë kishte caktuar masën e paraburgimit prej një muaji për tre deputetët, por një ditë më vonë, Gjykata e Apelit ua kishte ndryshuar atyre masat e sigurisë.

Ndaj Kurtit dhe Kadaj-Bujupit, është caktuar masën e arrestit shtëpiak, derisa Haxhiu është lënë e lirë.

Për mospjesëmarrje në seancat gjyqësore ndaj Albin Kurtit edhe më herët ishte lëshuar urdhërarrest.

Në seancën e paraparë të mbahej më 21 prill të këtij viti, gjyqtari i rastit, Beqir Kalludra kishte paralajmëruar se do të nxjerr urdhërarrest ndaj Albin Kurtit, pasi që ky i fundit nuk kishte prezantuar në seancë.

Mirëpo, urdhërarresti ndaj Kurtit ishte pezulluar pak para mbajtjes së zgjedhjeve parlamentare të 11 qershorit 2017, nga vet gjyqtari Kalludra që kishte lëshuar urdhërarrestin.

Ndërkohë, seancat gjyqësore në këtë rast kishin dështuar të mbaheshin edhe më 13 shtator të këtij viti, me ç’rast edhe atëherë gjykata kishte lëshuar urdhërarrest për deputetët Albin Kurti dhe Donika Kadaj – Bujupi, të cilët kishin munguar në atë seancë.

Gjithashtu, për shkak të mungesës së të këtyre dy deputetëve kishte dështuar të mbahej edhe seanca e 10 tetorit.

Përveç tyre, për hedhjen e gazit lotsjellës në Kuvendin e Kosovës, akuzohen edhe deputetët Ismajl Kurteshi nga Vetëvendosje dhe Haxhi Shala nga Nisma për Kosovën.

Ndryshe, aktakuza ndaj deputetëve të Kuvendit të Republikës së Kosovës është ngritur nga Prokuroria Themelore në Prishtinë, më 16 dhjetor 2015.

Ata akuzohen për përdorim të armës ose mjetit të rrezikshëm dhe pengim të personit zyrtar në kryerje të detyrës zyrtare.