Deputeti i AAK-së, Shkumbin Demaliaj e ka akuzuar kryeministrin e Kosovës, Albin Kurti, se më 6 dhjetor është takuar me Gjuriqin në Berlin dhe i ka premtuar atij largimin e taksës në këmbim të votave të Listës Serbe.

Demaliaj ka thënë në RTV Dukagjini, se takimin e Kurtit me Gjuriqin e ka ndërmjetësuar një organizatë joqeveritare.

“Ndërmjetësimin e ka bërë organizata joqeveritare CIG. Drejtues i saj më duket është Shpejtim Gashi”, tha ai dhe ka kërkuar nga organet e sigurisë të hetojnë këtë veprim të Kurtit.

Demaliaj ka thënë se nëse ky takim nuk ka ndodhur do të kërkonte falje për deklaratat e tij.  Ai po ashtu ka thënë se “kur iu deshën votat e Listës Serbe, ata u kthyen në Kuvend dhe votuan zonjën Osmani për kryetare të Parlamentit”.

Demaliaj ka thënë se deklarata e Kurtit për largimin e taksës është një provokim për të parë se si po reagon opinion public dhe ka shtuar se derisa taksa është kusht për njohje, largimi i saj do të ishte tradhti kombëtare.

Largimi i taksës do të dëmtonte Kosovën dhe prodhuesit vendorë. Dua të besoj se janë vetëm deklarata e nuk do të bëhet realitet largimi i taksës”.Demaliaj thotë se në raport me Serbinë, Kurti nuk do të mund të garantojë as rregullimin e njohjes së diplomave të Kosovës për studentët nga Lugina e Preshevës.