Çmimin Nobel për fizikë e fituan tre shkencëtarët britanikë David J. Thouless, F. Duncan M. Haldane dhe J. Michael Kosterlitz.

Komiteti i Nobelit ka deklaruar se si meritor për çmimin në fizikë këtë vit janë konsideruar Thouless, Haldane dhe Kosterlitz, për kontributin e tyre në ndryshimin e fazave topologjike dhe zbulimin teorik të fazave topologjike të materies.

Komiteti ka theksuar se gjysma e çmimit i është dhënë Thouless, ndërsa gjysma tjetër është ndarë midis Haldane dhe Kosterlitz.

“Fituesit e çmimit të këtij viti hapën dyert e një bote që nuk ishte e njohur, se materiali mund të hyjë në gjendje të ndryshme. Shkencëtarët kanë përdorur metoda të ndryshme matematike për t’i studiuar fazat apo gjendjet e panjohura të materies, siç janë super-përçuesit, super-fluidet dhe shtresat e holla magnetike. Në saj të punimeve kryesuese, fazat e reja të materies dhe të panjohura deri më tani u bënë temë studimesh”, thuhet në deklaratën e komitetit.

Shkencëtarëve çmimi do t’u dorëzohet në ceremoninë e ndarjes së çmimeve që do të mbahet më 10 dhjetor me rastin e përvjetorit të vdekjes së Alfred Nobelit.

Ndërkaq, Komiteti i Nobelit nesër do ta bëjë publik emrin e fituesit të Çmimit Nobel në kimi. Nga ana tjetër, fituesi i çmimit për paqe do të shpallet ditën e premte, ndërsa ai për ekonomi më 10 tetor. Ende nuk dihet se kur do të jepet Çmimi Nobel për letërsi, në të cilin përflitej edhe shkrimtari shqiptarë Ismail Kadare.