Qyteti i platformës së naftës Neft Daşları, një strukturë e rrallë dhe e pazakontë e ndërtuar në epokën sovjetike, qëndron mbi ujërat e Detit Kaspik, liqenit më të madh në botë.

Ai ndodhet rreth 100 kilometra larg nga Baku, kryeqyteti i Azerbajxhanit, dhe mund të arrihet vetëm pas një udhëtimi gjashtë orësh me varkë nga bregu.

Neft Daşları, ose “Shkëmbinjtë e Naftës”, është platforma më e vjetër e naftës në det të hapur në botë, sipas Librit të Rekordeve Guinness.

Qyteti filloi të ndërtohej në vitet 1940 nga punëtorët sovjetikë, të cilët krijuan një rrjet të ndërlikuar pusesh nafte, ura metalike dhe struktura akomoduese për mijëra punëtorë.

Në kulmin e tij, në vitet 1960, aty jetonin mbi 5000 njerëz dhe prodhoheshin miliona tonë naftë çdo vit. Ishte si një qytet i gjallë mbi det, me banesa, një kinema, furrë buke dhe një fushë futbolli të vendosur mbi struktura çeliku.

Megjithatë, me kalimin e viteve, prodhimi i naftës në Neft Daşları ka rënë, ndërsa qyteti është dëmtuar nga kushtet e vështira të ujit të kripur dhe stuhive të ashpra të Detit Kaspik. Sot, aty punojnë rreth 3000 punëtorë, të cilët kalojnë 15 ditë në det dhe më pas 15 ditë në tokë.

Ndonëse qyteti ende prodhon naftë, e ardhmja e tij është e pasigurt.

Disa sugjerojnë që Neft Daşları të kthehet në një atraksion turistik ose një muze për të ruajtur trashëgiminë e industrisë së naftës në rajon.

Për momentin, ai mbetet një simbol i një industrie që po pakësohet, ndërsa shqetësimet për ndotjen e mjedisit po shtohen/A2cnn