Jo vetëm Hëna e përgjakur e 27 korrikut… Këtë muaj, astrofilë dhe astronomë mund të admirojnë në qiellin e natës dy “lëmsha të zjarrtë”: i pari Hëna, e kuqe prej hijes së krijuar nga eklipsi total, dhe lëmshi i dytë do të jetë Planeti i Kuq, i cili duke qenë se do të jetë kundërvënë Diellit, do e arrijë maksimumin e dukshmërisë në 31 korrik.

Në Shqipëri, orari kur mund të shihet kjo gjë shkon nga 18:14 e 27 korrikut deri në 01:28 e 28 korrikut. Ndërkohë në shumë vende të Evropës janë krijuar tashmë vendet “e radhës së parë”, ku të apasionuarit mund të shohin këtë spektakël qiellor.

Orbita e Hënës do të përshkojë totalisht zonën e hijes së Tokës për shkak të reshtimit me Tokën. Fillimisht errësimi do të jetë vetëm i pjesshëm, dhe ky fenomen do tënisë në 20:24, në 27 korrik. Në orën 21:30, Hëna do të hyjë në zonën e hijes së Tokës dhe do të nisë eklipsi total. Errësimi maksimal do të ndodhë në orën 22:22 të 27 korrikut. Më pas, Hëna do të dalë nga hija e tokës dhe eklipsi total do të përfundojë në orën 00:19, duke i lënë sërish vend eklipsit të pjesshëm. Eklipsi i pjesshëm do të marrë fund në 01:28./ bota.al