Në edicionin e gjashtë të “Anibar”, që mbahet prej 20 deri me 26 gusht, vjen regjisori, producenti dhe skenaristi i mirënjohur amerikan Mike Reiss, ndryshe i njohur si producent dhe skenarist i serialit më të famshëm të animuar, “The Simpsons”.

Mike, sipas komunikatës për media të “Anibar”, vjen në festival që të prezantojë punën e tij 26 vjeçare në “The Simpsons” dhe ta ndajë atë me publikun kosovar.
Reiss ka studiuar në Universitetin e Harvardit, duke u fokusuar më shumë në komedi, shfaqje dhe në skenar. Në Harvard ai u takua me Al Jean, ku të dy bashkëpunuan dhe filluan të shkruanin për revistën satirike Harvardit, “Lampoon”, raporton Koha.net.
Pas diplomimit, revista satirike “National Lampoon” i punësoi Mike Reiss dhe Al Jean të vazhdonin shkrimet e tyre komike. Gjatë kësaj periudhe ata punuan edhe si skenaristë dhe producentë të shumë shfaqjeve televizive.
Në vitin 1989, Reiss u punësua së bashku me Jean në rrjetin televiziv FOX si anëtarë të stafit për të filluar serinë e animuar “The Simpsons”. Ata më vonë u bënë edhe producentët dhe përgjegjësit kryesor të serialit në fjalë.
Reiss ishte përgjegjës kryesor për krijimin shumë episodeve të “The Simpsons”, duke përfshirë skenarin, animacionin, zërimin dhe muzikën.
Mike Reiss ka fituar katër çmime “Emmy” gjatë njëzet e gjashtë viteve të tij me “The Simpsons”. Ai udhëhoqi të gjithë sezonin e katërt të “The Simpsons” që nga “Entertainment Weekly” është quajtur si “sezoni më i mirë i serialit më të mirë në histori”.
“Queer” është një tjetër seri e animuar në të cilën Mike Reiss ka qenë skenarist, e që është emëruar në “100 animacionet më të mira të të gjitha kohërave” nga rrjeti BBC.
Po ashtu Reiss është producent në serialin e njohur “The Critic” që i kushtohet kritikut të filmit të animuar, Jay Sherman.
Në vitin 2006, Reiss ka marrë çmimin për arritje jetësore nga Asociacioni i Skenaristëve të Animacionit.
Reiss, përveç tjerash, ka kontribuar edhe në shumë filma animuar të metrazhit të gjatë si “Ice Age”, “Despicable Me”, “Kung Fu Panda”. Ai gjithashtu ishte bashkë-skenarist për filmin “The Simpsons” në vitin 2007.
Mike Reiss në edicionin e gjashtë të “Anibar” do të bëjë prezantimin “The Simpsons Backstage Tour”. Ky projekt u financua përmes grantit të Ambasadës Amerikane në Prishtinë.