Ansambli i Këngëve dhe Valleve “Kastrioti” çeli mbrëmë në Ferizaj manifestimin tradicional “Ditët e Kulturës”, një eveniment kulturor që për disa ditë me radhë do të ofrojë një sërë aktivitetesh.

Gjatë shfaqjes në teatrin e qytetit “Adriana”, ansambli kishte përgatitur enkas dy koreografi premierë, ndërsa kryetari i Ferizajt, Muharrem Sfarqa, këtë manifestim e vlerësoi si ngjarjen më të rëndësishme kulturore në qytet.

“Po e fillojmë edhe sivjet manifestimin tashmë tradicional “Ditët e Kulturës”, në prag të përvjetorit të 16 të të çlirimit. Është ky një rast i mirë që krijuesit nga Ferizaj, veprimtarët dhe të gjithë ata që merren me aktivitete kulturore, të paraqesin arritjet vjetore në fusha të ndryshme të arteve”, tha Sfarqa.

Artdashësit dhe dashamirësit e kulturës kanë një rast të mirë të njihen me rrjedhat e krijimtarisë kulturore dhe t’i shijojnë ato vlera që po krijohen në këtë mjedis. Por jo vetëm kaq. Manifestimi sivjet do të ketë edhe vlera artistike të ardhura nga jashtë Ferizajt. Artistë nga Shqipëria pritet të shfaqin para publikut arritjet e tyre, gjë që e begaton manifestimin dhe i jep dimensione më të gjera se ato lokale.

“Ta ngrenë ndjesinë pozitive në sfera më të larta, ta rrisin prirjen konstruktive e mirëdashëse të qytetarëve tanë dhe të shtojnë ndjenjat për të bukurën tek publiku. Duke qëndruar në mesin e këngëtarëve, të valltarëve, letrarëve, recituesve e aktorëve, presim të mbushemi me më shumë energji pozitive, ta përmirësojmë këndvështrimin e jetës dhe të përjetojmë më shumë kënaqësi estetike. Le të jetë manifestimi “Ditët e Kulturës” një festë parapërgatitore për festën e madhe që na pret më 12 qershor, kur Ferizaj dhe Kosova shënon 16-vjetorin e fillimit të një jete, të ëndërruar nga dhjetëra breza”, ka përfunduar Sfarqa.

Manifestimi “Ditët e Kulturës” do të vazhdojë deri më 12 qershor.