Është hapur sot me një ceremoni zyrtare panairi i 18-të i librit “Prishtina 2016”, cili mbledhë në Prishtinë rreth 100 botues nga Kosova, Shqipëria, Maqedonia dhe diaspora.

Veç lexuesve që ia mësynë panairit të librit për të parë rreth më 1500 tituj të rinj të librave, në hapjen zyrtare ishte edhe i pari i Qeverisë së Kosovës, Isa Mustafa.

Nga të pranishmit e institucioneve, kjo ditë u quajt festë e vendit dhe si një ngjarje madhore e cila promovon rritjen e kulturës dhe leximit, këto dy të fundit siç u tha janë më të rëndësishmet për vendin, dhe për një shoqëri moderne. Gjithashtu, u tha se shqiptarët i janë bashkuar Evropës nga pikëpamja kulturore.

Kryeministri Mustafa ka theksuar se panairi i librit tashmë është bërë një traditë dhe shenjë identifikuese e shqiptarëve.

“Kjo është festë e bukur e artit dhe kjo festë e së ardhmes sepse librat e bënë jetën më të bukur. Panairi i librit është festë e librit dhe shenjë e identitetit tonë dhe thërret në kujtesën tonë për rëndësinë që ka dhe për kënaqësinë që sjell libri”, tha Mustafa.

Ai shtoi që libri mbetet udhërrëfyes i së ardhmes së vendit.

“Libri mbetët udhërrëfim për të ardhmen tonë dhe ky panair tashmë është bërë pjesë e traditës shqiptare”, tha kryeministri.

Edhe Daut Demaku e zëvendësministri i Kulturës së Shqipërisë, Zef Quni e kanë quajtur të rëndësishme këtë panair.

“Tash e kemi kaluar periudhën e adoleshencë s dhe besoj që jemi pjekë dhe disa prej gabimeve nuk do na falen”, tha Demaku duke iu referuar 18-vejtorit të panairit.

Panairi i 18-të i Librit në Prishtinë, do të mbahet nga data 7 deri me 12 qershor në Pallatin e Rinisë dhe do të jenë mbi 1500 tituj të rinj të librave.

Panairi i parë është mbajtur në datat 17-22 nëntor të vitit 1999, ndërsa të tjerët organizohen gjatë muajve maj-qershor. / Arbresh.info