Në Parkun e Gërmisë në Prishtinë, nga sot deri të shtunën do të kenë mundësinë të shijojnë muzikën e huaj dhe të shohin nga afër edhe artistët e njohur ndërkombëtar por edhe ata shqiptar. Kjo u bë e mundur, pasi që në pasditen e së enjtes në këtë hapësirë gjelbëruese u hap festivali P+, festival ky i muzikës, artit dhe teknologjisë.

Ky festival është më ndryshe se festivalet që jemi mësuar të shohim në Kosovë, e më të veçantë e bënë kreativiteti i të rinjve kosovarë, ku përmes bimëve paraqesin tinguj të muzikës, “piano bimore”.

Njëri ndër organizatorët e festivalit tre ditor që do të jetë i hapur nga ora 15:00 deri në orën 06:00, të mëngjesit, Rron Gjushinca, ka treguar detajet e këtij festivali për KosovaPress.

Ai tha se veç skenës që të festivalit e cila është po e njëjta si e skenave botërore, më ndryshe dhe më interesante e bënë teknologjia që do të prezantohet dhe arti. Veç kësaj më të veçantë e bënë edhe hapësira ku do të mbahet festivali.

“Këtë festival e bënë më ndryshe vetë fakti që po shihet edhe skena që është një prej skenave botërore që i sheh nëpër festivale tjera. Këtu përveç muzikës që ka me qenë është më interesant që ka me pas edhe teknologji dhe art, është sektori i ICK, që do të prezantojnë, teknologji të reja, ide të reja…ka aktivitete të ndryshme përveç muzikës, ka artistë shumë të njohur, një prej tyre është  natën e parë, Bushido, që është një prej artistëve më të njohur gjerman dhe botëror. Por përveç tij kemi edhe repera të njohur shqiptar”, tha Gjushinca.

Por festivale të këtij lloji dhe këtij organizimi, Gjushinca e sheh si të domosdoshme për të rinjtë e Kosovës, ku siç tha ai këta të rinj e meritojnë një angazhim të këtij lloji.

“Përveç faktit se kemi shumë rini dhe njihemi si  shtet me shumë rini, unë duke ia nisur nga vetja e di se shumë prej shoqërisë sime sa më shumë që njoh janë të involvuar shumë në muzikë, sidomos  janë në trend me këngët e reja, me artista të ri dhe besoj që e meritojnë me pas kësi angazhimesh dhe kësi aktivitetesh”, theksoi Gjushinca.

Bashkë organizator i pjesës së teknologjisë ICK, Oltin Beshiri tha se në natën e parë të këtij festivali do të shpalosin printerin 3D, ku do të prezantojnë disa pamje virtuale. Megjithatë, ai shpreson që kjo nismë të vazhdojë edhe në vitet në vazhdim.

E reja e cila ishte pjesëtar të akademisë së teknologjisë, ka prezantuar edhe projektin e saj të tingujve muzikor të krijuar nga bimët e ndryshme.

“Kjo është një kitarë me lule, apo me lloje të bimëve të ndryshme, ku jemi munduar të bëjmë me prekje që të del tingujt e kitarës, pasi që është festivali më shumë për tokën, muzikën dhe artin, kemi përdoru bimën përndryshe do të mund të bëhej edhe me pemë, perime  apo çdo gjë që e gjejmë në shtëpi” ka treguar ajo.

Ndryshe, çmimet e biletave për këtë festival në natën e parë do të jenë 20 euro, vlen për biletat të cilat do të blihen në hyrje, ndërsa, do ketë edhe bileta me çmim prej 15 euro.