Shfaqja “Lufta në kohën e dashurisë” e Qendrës Multimedia nga Prishtina ka hapur sonte edicionin e 45-të të Festivalit të Teatrove të Kosovës, i cili tradicionalisht organizohet në Ferizaj.

Me këtë rast është thënë se për shtatë net me radhë Ferizaj do të jetojë me ngjarjen më të rëndësishme kulturore jo vetëm tek ne, por edhe në rajon.

U tha se ky edicion ngërthen në vete shfaqje zhanresh të ndryshme që vijnë nga Kosova, Shqipëria dhe Maqedonia.

Në hapje të festivalit, kryetari i Ferizaj, Muharrem Svarqa, nën patronatin e të cilit edhe po mbahet ky festival ka thënë se ky festival shënon jubileun e 45 të ekzistimit të tij.

Ai ka thënë se ndjehet mirë dhe i nderuar me rezultate e mira të arritura në këtë historik jo të shkurtër duke pasur edhe pak a shumë edhe përfaqësime edhe në nivele të ndryshme, sepse dikur nga këto skena janë bartur vlera artistike anembanë rajonit.

“Duke shprehur dëshirën time që kjo traditë të vazhdoj nuk ka asnjë dy shim se juria edhe kësaj radhe do t’i gjejë më të mirët dhe do t’i vlerësoj meqë festivali ka karakter garues.Ne në komunën e Ferizajt kemi bërë të gjitha përpjekjet për ta ngritë dhe avancuar artin në përgjithësi si domosdoshmëri dhe si dëshirë që ta fisnikërojmë shpirtin dhe në të njëjtën kohë ta shpërndajmë dëshirën dhe nevojën për një katarsis shpirtëror pas dinamikave shumë të mëdha që po na përcjellin në jetën tonë të përditshme”, ka nënvizuar Svarqa.

Në skenën e Teatrit “Ardiana” gjatë kësaj kohe do të ngjiten më shumë se 100 aktorë, ndërsa festivali ka karakter garues dhe shfaqjet më të mira do të shpërblehen me çmimet e fsetivalit.

Në këtë edicion juria profesionale do të jetë në përbërje Fadil Hysaj, Mehmet Xhelili, Ismajl Ymeri, Dardana Mehmeti dhe Shkëlzen Marevci, ndërsa tryezën e festivalit do ta udhëheqë dramaturgu prof. Haqif Mulliqi.

Ndryshe, Festivalin e 45 të Teatrove të Kosovës e ka mbështetur komuna e Ferizajt, Ministria e Kulturës, Raiffaisen bank dhe RTV Tema.