Akademia Verore Europiane e Muzikës në Prishtinë – ESMA (European Summer Music Academy in Prishtina) ka shtyrë afatin e thirrjes për aplikim deri më 3 korrik, për studentë të cilët dëshirojnë të ndjekin master klasat me profesorë eminentë evropianë dhe vendorë. Edicioni i katërt i Akademisë do të mbahet në kryeqendrën kosovare nga data 19 deri më 30 korrik.

Aplikimi për pjesëmarrje në ESMA mund të shkarkohet në ueb faqen zyrtare të Akademisë www.music-academy-prishtina.com dhe pjesëmarrja për të gjithë të interesuarit (18 – 35 vjeç) është falas, ndërsa për studentë jashtë Prishtinës dhe Kosovës sigurohet edhe akomodimi në konviktin e Universitetit të Prishtinës.
Kjo Akademi është e para e llojit të vet në Kosovë. Si e tillë, qe themeluar në vitin 2012, me iniciativën e Ambasadës Çeke në Kosovë dhe që atëherë ESMA ka bashkuar profesorë të dalluar të muzikës nga vende të ndryshme europiane, të cilët së bashku me kolegë të tyre nga Kosova, Serbia dhe rajoni kanë punuar me studentë vendorë dhe ndërkombëtarë.

‘ESMA 2015’ artistikisht drejtohet nga dirigjenti dhe pianisti Desar Sulejmani, i cili jeton dhe punon në Gjermani. Sulejmani njëherësh do të drejtojë edhe Orkestrën Kamertale të Akademisë, e cila do të themelohet për herë të parë, ndërsa këtë vit Akademia numëron 18 profesorë pjesëmarrës të profileve të ndryshme.

Akademia Verore Europiane e Muzikës organizohet në patronazhin e Ambasadës së Luksemburgut në Kosovë, ndërsa përkrahet nga disa ambasada të shteteve evropiane (Ambasada Gjermane, Ambasada Norvegjeze, Ambasada e Holandës, Ambasada Zvicerane, Ambasada Hungareze, Ambasada Çeke, Ambasada Austriake, Ambasada Franceze, Zyra Ndërlidhëse Rumune), “Kultura për të gjithë – Faza III” – projekt i Bashkimit Europian, i menaxhuar nga Zyra e Bashkimit Evropian në Prishtinë dhe implementuar nga Interarts, Pro Credit Bank, Filarmonia e Kosovës, Fakulteti i Arteve, Pallati i Rinisë, Teatri Kombëtar, Hotel Sirius, Swiss Diamond Hotel etj.