Në tre muajt e parë të 2020-es në Kosovë janë hapur mbi 2 mijë ndërmarrje të reja.

Saktësisht janë regjistruar 2 311 ndërmarrje në periudhën janar mars të këtij viti, shkruan arbresh.info.

Në raportin Statistikor mbi Ndërmarrjet Ekonomike në Kosovë për tremujorin e parë (TM1) 2020 të publikuar nga Agjencia e Statistikave të Kosovës thuhet se ky numër është më i vogël se periudhën e njëjtë të vitit të kaluar.

Sipas të njëjtit raport ka rënie prej 3.86% të ndërmarrjeve të regjistruara.

“Në tremujorin e parë të vitit 2020 (TM1 2020) gjithsej janë regjistruar 2 311 ndërmarrje. Krahasuar këtë tremujor me tremujorin paraprak (TM4 2019) ka një rënie prej (-9.94%) të ndërmarrjeve të regjistruara. Ndërsa, krahasuar TM1 2020 me tremujorin e njëjtë të vitit paraprak (TM1 2019) ka rënie prej (-3.86%) të ndërmarrjeve të regjistruara”, thuhet në raport.

E në mesin e ndërmarrjeve të regjistruar këtë vit në Kosovë shumica janë tregti me shumicë dhe pakicë, riparimi i mjeteve motorike, motoçikletave.

Pasuar nga prodhimi me 363 ndërmarrje të regjistruara, e akomodimi dhe aktivitetet e shërbimeve me ushqim me 270 ndërmarrje të regjistruara.

“Për sa u përket aktiviteteve ekonomike, më të preferuarat gjatë këtij tremujori ishin: Tregtia me shumicë dhe pakicë, riparimi i mjeteve motorike, motoçikletave me 590 ndërmarrje të regjistruara (25.5%);  Prodhimi  me 363 ndërmarrje të regjistruara (15.7%); Akomodimi dhe aktivitetet e shërbimeve me ushqim me 270 ndërmarrje të regjistruara (11.7%); Aktivitetet profesionale, shkencore dhe teknike me 225 ndërmarrje të regjistruara (9.7%); Ndërtimtaria  me 213 ndërmarrje të regjistruara (9.2%), etj .”, thuhet më tej në raport.

95.6% e ndërmarrjeve të regjistruara hynë në kategorinë me 1 deri në 4 të punësuar ndërsa asnjë nuk kalon 250 të punësuar.

“Gjatë këtij tremujori, në kategorinë me 1 deri në 4 të punësuar janë gjithsej 2 209 ndërmarrje të regjistruara (95.6%);  në kategorinë me 5 deri 9 të punësuar janë 64 sosh (2.8%); në kategorinë me 10 deri 19 të punësuar janë 25 ndërmarrje të regjistruara (1.1%); në kategorinë me 20 deri 249 të punësuar janë 13 ndërmarrje të regjistruara (0.6%); ndërsa në kategorinë me 250 e më shumë të punësuar, nuk ka ndonjë një ndërmarrje të regjistruar”, thuhet në raportin e ASK-së.

Komuna e Prishtinës prin me numrin më të madh të ndërmarrjeve të regjistruara këtë tre mujor, gjithësej741 ndërmarrje, pasuar nga Ferizaj, Prizreni e Gjilani.

“Sa i përket shtrirjes gjeografike të ndërmarrjeve të regjistruara në nivel të komunave, ashtu si në çdo tremujor, mbizotëron komuna e Prishtinës me 741 ndërmarrje të regjistruara (32.1%); Ferizaj me 178 ndërmarrje të regjistruara (7.7%); Prizreni me 162 ndërmarrje të regjistruara (7.0%);  Gjilani me 139 ndërmarrje të regjistruara (6.0%); Peja me 133 ndërmarrje të regjistruara  (5.8%); dhe Fushë Kosova me 101 ndërmarrje të regjistruara (4.4%). Ndërsa komunat e tjera kanë numër më të vogël të ndërmarrjeve të regjistruara në këtë tremujor”, thuhet në Statistikor mbi Ndërmarrjet Ekonomike në Kosovë për tremujorin e parë (TM1) 2020 të publikuar nga Agjencia e Statistikave të Kosovës./arbresh.info/