Mirëmbajtja e autostradës “Ibrahim Rugova” i ka dalë proces i vështirë Ministrisë së Infrastrukturës (MI). Kjo Ministri po rrezikon të mbetet pa zyrtarin kryesor të prokurimit Arif Zhushin, ngase janë evidentuar parregullsi nga ana e prokurimit të Ministrisë, kur i ka shpallur fituesit e tenderit për mirëmbajtjen e autostradës “Ibrahim Rugova”, shkruan Zëri.

Nga data nëntë dhjetor, Organi Shqyrtues i Prokurimit i ka dhënë afat Ministrisë që brenda pesë ditëve të formojë një komisioni për vlerësimin e ofertave. Ky afat i OSHP-së ka ardhur pas vendimit të datës 10 tetor kur Gjykata e tenderëve pati vendosur që ta kthejë në rivlerësim tenderin “Mirëmbajtja rutinë për vitin 2015 dhe 2016 dhe Mirëmbajtja dimërore për sezonin dimëror 2015/2016 dhe Mirëmbajtja dimërore për vitin 2016/2017 e Autoudhës “Ibrahim Rugova” A7-segmenti Morinë – Gjurgjicë Loti 1; dhe Autoudhës A7 – Segmenti Bresje – Besi, Rrugës Nacionale N9, Segmenti Bresje – Gjurgjicë – Udhëkryqit të Autoudhës A7/A6 deri në Konjuh dhe kyçja me Rrugën Nacionale N2- loti 2”. Në Ministrinë e Infrastrukturës nuk kanë treguar nëse do ta zbatojnë urdhëresën e lëshuar, por kanë pranuar se kanë telashe me OSHP-në.