Ministria e Tregtisë dhe Industrisë ka paraqitur sot të dhënat në lidhje më lëvizjet e fundit të çmimeve të derivateve të naftës, sipas të cilave Kosova ka çmimin më të ulët të benzinës në Evropë, ndërsa dizeli është më i lirë vetëm në Maqedoni.

MTI me anë të komunikatës së sotme gjithashtu fton të gjithë qytetarët që kanë dyshime në cilësinë e karburanteve dhe korrektësinë e matjes nëpër pikat e shitjes me pakicë të karburanteve të raportojnë rastet tek Departamenti për Mbrojtjen e Konsumatorit në kuadër të MTI-së.

“Në vazhdën e informimit të rregullt të publikut, Ministria e Tregtisë dhe Industrisë, pas analizimit të të dhënave të përditësuara të lëvizjeve të çmimeve të derivateve të naftës në tregjet ndërkombëtare dhe të çmimeve të shitjes me pakicë të karburanteve të naftës në Kosovë, ka konstatuar se çmimet aktuale në tregun vendor janë duke lëvizur më një ritëm pothuajse të njëjtë me lëvizjet në tregjet rajonale dhe evropiane të shitjeve me pakicë (shih të bashkëngjitur me këtë njoftim tabelën dhe grafikun me çmimet aktuale të këtyre ditëve).

Sipas këtyre të dhënave, Kosova përsëri ka çmimin më të ulët të shitjes me pakicë të benzinës: çmimi mesatar i shitjes me pakicë të këtij derivati gjatë javës së fundit është rreth 1.07 €/l, ndërsa sa i përket dizelit, përveç Maqedonisë, Kosova e ka çmimin shitës më të ulët në rajon dhe në Evropë, gjegjësisht ai sillet rreth 1.05 €/l.

Në Kosovë operojnë mbi 50 importues ekonomikë të licencuar që merren vetëm me importim të produkteve të dizelit dhe benzinës dhe kjo konkurrencë ka bërë që çmimet e shitjes me pakicë të derivateve të vet-rregullohen në mënyrë të natyrshme, në varësi të lëvizjeve në berëzat ndërkombëtare të karburanteve, me një periudhë të shkurtër kohore për të absorbuar sasitë e rezervave që operatorët kanë në depot e tyre. Në bazë të informatave të MTI-së asnjëri nga importuesit kosovar të karburanteve nuk furnizohen drejtpërsëdrejti nga berëzat ndërkombëtare kështu që edhe kjo rrethanë ndiko n në çmimin final të shitjes me pakicë. Ndryshimet e çmimeve të naftës së papërpunuar reflektojnë pas 3-5 ditëve nga dita e ndryshimit të çmimit të furnizimit (importit) me dizel dhe benzinë. Gjithashtu, ndryshimet e çmimeve të furnizimit (importit) me dizel dhe benzinë reflektohen në tregun me pakicë pas një deri dy javësh.

Ministria e Tregtisë dhe Industrisë nëpërmjet Departamentit për Rregullimin e Tregut të Naftës, Inspektoratit të Tregut dhe Agjencisë së Metrologjisë janë duke u angazhuar seriozisht në verifikimin dhe kontrollimin e operatorëve ekonomikë që merren me tregtimin e karburanteve të naftës në Kosovë”, thuhet në njoftimin e MTI-së.