Ekonomia në Eurozonë, sipas vlerësimeve të Komisionit të BE-së, gjatë vitit në vijim do të rritet shumë më fuqishëm nga sa parashikohej deri më sot. Pagat do të rriten më shpejt. Ekonomia në 19 vendet e Eurozonës, sipas Komisionit të BE-së, po rritet sivjet më fuqishëm krahasuar me të gjitha dhjetë vitet e fundit.

Produkti i brendshëm bruto (BIP) në hapësirën e Euros mund të rritet me 2,2 përqind, e kësisoj më shumë se në pranverë, kur pritej një kuotë rritjeje prej 1,7 për qind. Kjo del nga raporti i vjeshtës për prognozat i këtij autoriteti në Burksel, bërë publik të enjten (9.11). Për vitin 2018 Komisioni e ka rritur parashikimin e rritjes së BIP me 2,1 nga 1,8 për qind sa ishte parashikimi deri tani. Ndërsa për 2019 parashikon një rritje me 1,9 për qind.

“Ekonomia dhe punësimi po rriten në mënyrë robuste, investimet po rriten dhe deficitet në sektorin publik dhe kuota e borxheve janë në rënie”, tha zëvendëspresidenti i Komisionit të BE-së Valdis Dombrovskis. Politika duhet të kujdeset, që “rritja ekonomike të bëhet e prekshme për mbarë shoqërinë”. Komisari i BE-së për ekonominë Pierre Moscovici shtoi: “Probleme të caktuara si borxhet e larta dhe rritjet e ngadalta të pagave do të vazhdojnë.”

Optimizëm për tregun e punës.

Për tregun e punës Komisioni shprehet optimist. Mesatarja e kuotës së papunësisë për vitin 2017 do të jetë 9,1 për qind e kësisoj në nivelin më të ulët që nga viti 2009. Vlera mund të ulet edhe më tej dhe më 2019 ajo mund të jetë në 7,9 për qind. Numri i të punësuarve parashikohet të arrijë rekorde të reja. Inflacioni në Eurozonë sivjet do të jetë mesatarisht 1,5 për qind, më 2018 do të ulet me 1,4 për qind dhe më 2019 sërish do të ketë rritje me 1,6 për qind.

Malta kryeson

Malta është ndër 19 vendet e Eurzonës sërish kryesuse për rritjen ekonomike. Në këtë vend Komisioni parashikon një rritje për 2017 me 5,6 për qind. Edhe në Irlandë koniuktura do të rritet fuqishëm me 4,8 për qind dhe në Slloveni me 4,7 për qind. Ekonomia gjermane sipas parashikimeve rritet më 2017 me 2,2 përqind po aq shpejt sa edhe e gjithë Eurozona bashkërisht dhe më 2018 do të jetë një rritje me 2,1, ndërsa më 2019 me 2,0 për qind. Vendet e tjera të industrializaura si Franca dhe Italia, sipas Komisionit, në vitet 2017 deri më 2019 do të kenë një rritje më të moderuar ekonomike. Në Francë kuota e rritjes parashikohet me rreth 1,6 për qind dhe në Itali me 1,5 për qind sivjet dhe rreth 1,0 për qind më 2019.

Risku mbetet

Për Spanjën Komisioni pret për 2017 një rritje me 3,1 përqind. Kriza kushtetuese për Katalonjën deri më tani i ka mpirë tregjet. Megjithatë ende nuk mund të parashikohet, se si do të mund të influencojë konflikti vitin e ardhshëm ndaj rritjes ekonomike. Si risqe për koniunkturën në hapësirën e Eurozonës ekspertët e BE-së vlerësojnë rritjen e tensioneve si kriza për Korenë e Veriut, kushtet më të këqia mbarëbotërore të financimit dhe izolimi i tregjeve në tregtinë botërore.