Gjatë muajit qershor në Kosovë ka pasur ndryshim të çmimeve të produkteve të ndryshme.

Rënie të çmimeve kanë pësuar qumështi, djathi, vezët dhe perimet, shkruan arbresh.info.

Kështu bëhet e ditur në raportin ‘“Indeksin e Harmonizuar të Çmimeve të Konsumit” (IHÇK) për muajin qershor 2020; të publikuar nga Agjencia e Statistikave të Kosovës (ASK).

Aty thuhet gjithashtu se indeksi i tërësishëm i harmonizuar i çmimeve të konsumit ka pësuar rënie prej mesatare -0,4%.

“Indeksi i tërësishëm i harmonizuar i çmimeve të konsumit pësoi rënie në një mesatare prej -0,4 për qind në muajin qershor 2020 krahasuar me muajin maj 2020. Kjo kryesisht është shpjeguar me rënien e çmimeve të konsumit te nëngrupet e COICOP-it: qumështi, djathi dhe vezët (-2,8%), perimet (-9,3%), me një ndikim të përbashkët të këtyre nëngrupeve prej -0,5 për qind në IHÇK-it”, thuhet në raport.

Ndërsa ngritje të çmimeve ka pasur te përdorimi i pajisjeve për transportin personal

“Ndërsa ngritje e çmimeve vërehet te nëngrupi i COICOP-it: përdorimi i pajisjeve për transportin personal (1,0%) – (ngritje e çmimeve të naftës dhe benzinës) me një ndikim të këtij nëngrupi prej 0,1 për qind në IHÇK-it”, thuhet më tej në raport.

Ndërsa krahasuar me qershorin e një viti më parë ngritje të çmimeve janë vërejtur te buka, drithërat, mishi, pemët, çokolladat .

“Indeksi i tërësishëm i harmonizuar i çmimeve të konsumit është më i lartë për 0,1% në muajin qershor 2020 krahasuar me muajin qershor 2019. Kjo kryesisht është shpjeguar me ngritjen e çmimeve të konsumit në këtë periudhë te nëngrupet e COICOP-it: buka dhe drithërat (2,2%), mishi (1,0%), qumështi, djathi dhe vezët (2,6%), vajrat dhe yndyrnat (1,6%), pemët (8,7%), sheqeri, reçeli, mjalta, çokollata dhe ëmbëlsirat (3,6%), kafja, çaji dhe kakao (7,9%), ujë, pijet joalkoolike, lëngjet nga pemët dhe perimet (2,2%), pijet alkoolike (1,7%), energji elektrike, gaz dhe lëndë djegëse të tjera (0,8%) – (ngritje e çmimeve të druve për ngrohje), pajisje shtëpiake (1,7%), mallrat dhe shërbimet për mirëmbajtjen e zakonshme të ekonomisë shtëpiake (1,6%), produkte mjekësore, aparaturë dhe pajisje (5,2%), shërbimet ambulatore (5,5%), blerja e automjeteve (0,8%), shërbimet telefonike dhe të telefaksit (0,7%), shërbimet hoteliere (3,0%), gjërat personale (4,2%), sigurimet (19,2%) – (ngritje e çmimeve të sigurimeve të automjeteve), me një ndikim të përbashkët të këtyre nëngrupeve prej 1,5 për qind në IHÇK-it”, thuhet në raport.

E rënie të çmimeve ka pasur te përdorimi i pajisjeve për transportin personal

“Ndërsa rënie e çmimeve vërehet te nëngrupi i COICOP-it: përdorimi i pajisjeve për transportin personal (-18,1%) – (rënie e çmimeve të naftës dhe benzinës) me një ndikim të këtij nëngrupi prej -1,4 për qind në IHÇK-it”, thuhet në raportin e Agjencisë së Statistikave të Kosovës (ASK)./arbresh.info