Kanë mbetur edhe pak ditë deri në përfundimin e afatit për faljen e borxheve publike për personat juridik dhe fizik në Kosovë, të akumuluara deri më datën 31 dhjetor 2008.

Zyrtarë të Qeverisë së Kosovës, kanë bërë të ditur se qytetarët kanë mundësi që deri më 02 shtator të ushtrojnë të drejtën e tyre për të përfituar nga falja e borxheve, pasi që sipas tyre, nuk do të ketë afat shtesë.

Ndërkohë, njohës të rrethanave ekonomike në vend, thonë se pas kësaj date Qeveria e Kosovës mund të fillojë me vjelje të dhunshme të borxheve që qytetarët kanë ndaj shtetit.

Në muajin shkurt të vitit të kaluar Qeveria e Kosovës kishte marrë vendim për faljen e borxheve, kurse në muajin shtator ishte miratuar Ligji për Faljen e Borxheve Publike, me anë të të cilit përcaktohen kriteret dhe procedurat për faljen e borxheve publike për personat fizik dhe juridik deri më 31 dhjetor të vitit 2008.

Rreth 520 mijë ishte thënë se është numri i qytetarëve të Kosovës që kanë borxh ndaj institucioneve shtetërore dhe ndërmarrjeve publike me një vlerë monetare mbi 680 milionë euro.

Zëdhënësi i Ministrisë së Financave, Muharrem Shahini në një prononcim për Radion Evropa e Lirë, ka theksuar se procesi për faljen e borxheve po vazhdon. Sipas tij, ende nuk dihet se sa është shuma e borxheve të falura deri më tani.

“Shuma e borxheve është afër 680 milionë euro, por që mund jetë edhe më shumë deri në 700 milionë. Gjendja aktuale ndryshon në çdo moment. Ajo që mund të konstatojmë është se në të gjitha institucionet e përfshira në këtë proces kemi vazhdimisht shtim të numrit të qytetarëve për të përfituar nga Ligji për faljen e borxheve publike. Si Ministri e Financave aktualisht jemi të përkushtuar ta përmbyllim sa më suksesshëm këtë proces me 2 shtator”, thekson Shahini.

Duke e pasur parasysh kohën prej një viti, sa ka zgjatur procesi i faljes së borxheve, Shahini thekson se nuk ka arsye për shtyrje të afatit.

Përfaqësues të shoqërisë civile ndërkohë kërkojnë nga Qeveria e Kosovës që të shtyhet afati për faljen e borxheve si dhe të ofrojnë edhe alternativa të tjera me të lehta për shlyerjen e borxheve.

Drejtori i Qendrës për Hulumtime Srategjike dhe sociale, Ibrahim Rexhepi në një prononcim për Radion Evropa e Lirë thekson se institucionet qe kanë pasur për detyrim arkëtimin e mjeteve për shërbimet që bëjnë nuk kanë pasur një strategji efektive për vjeljen e këtyre mjeteve.

“Asnjë e treta e borxheve nuk janë përmbushur dhe kjo tregon se problemet do të zvarriten edhe pas datës 3 shtator. Qeveria ka mundësi që ajo të shkojë në arkëtim të dhunshëm apo të angazhojë armatë të tërë të përmbaruesve privat me qëllim të vjeljes së këtyre obligimeve.

“Por, kjo ka rrezikun e vet, nuk pres që qeveria të jetë aq e krisur që përnjëherë të insistojë në arkëtimine 700 milionë eurove, sepse kjo do të gjunjëzonte qoftë ekonominë, qoftë edhe qytetarin si konsumator”, thekson Rexhepi.

Rexhepi thekson se edhe nëse do të ketë shtyrje të afatit për faljen e borxheve duhet të krijohen modalitete tjera të cilat iu mundësojnë qytetarëve ,borxhlinjtë t’i përmbushin obligimet e tyre më shpejtë.

“Ne propozojmë që Qeveria e Kosovës të fshijë të gjitha ngarkesat që janë në emër të ndëshkimeve, gjobave dhe interesit, në mënyrë që nga qytetarët të insistojë të bëjë pagesën vetëm të kryegjësë dhe atë prej vitit 2009 deri në vitin 2015 dhe kjo do ta lehtësonte bukur shumë barrën e tyre”, thekson Rexhepi.

Ditë më parë Kompania Kosovare për Furnizim me Energji Elektrike iu kishte bërë thirrje të gjithë konsumatorëve që të përfitojnë nga Ligji për Faljen e Borxheve Publike dhe t’i nënshkruajnë kontratat para skadimit të afatit me 02 Shtator,

Sipas një njoftimi për media ata kishin treguar se janë nënshkruar mbi 21.000 kontrata për falje të borxheve. (REL)