Programi i Kombeve të Bashkuara për Zhvillim (UNDP) në Kosovë së bashku me Qeverinë e Luksemburgut dorëzuan sot ngarkesën e dytë të furnizimeve shëndetësore të përbërë nga 5,000 komplete testesh ekstraktimi Institutit Kombëtar të Shëndetësisë Publike në Kosovë (IKShPK) dhe Ministrisë së Shëndetësisë.

Ky donacion vjen si pjesë e një marrëveshje të arritur midis Qeverisë së Luksemburgut dhe UNDP-së për ofrimin e mbështetjes së menjëhershme për Kosovën për të luftuar COVID-19.

Ministri në detyrë i Shëndetësisë, Arben Vitia i cili ishte i pranishëm në këtë ceremoni theksoi rëndësinë e partneritetit në këto kohë të vështira.

“Testimi është komponentë e rëndësishme që ndikon në zvogëlimin e rasteve të përhapjes së virusit dhe kontributi i juaj është jashtëzakonisht i rëndësishëm për sistemin e shëndetësisë në Kosovë. Shfrytëzoj rastin që të falënderoj UNDP-në dhe Luksemburgun dhe të shprehi mirënjohjen time për ndihmën dhënë në këtë periudhë të emergjencës së shëndetit publik, “tha Vitia.

“UNDP i gjendet pranë institucioneve të Kosovës në luftën kundër pandemisë COVID-19. Donacioni i sotëm u bë i mundur përmes kontributit bujar nga qeveria e Luksemburgut përmes LuxDev në Kosovë të cilët i falënderojmë me gjithë zemër. Ne jemi duke bashkëpunuar ngushtë me Ministrinë e Shëndetësisë dhe institucionet tjera në Kosovë për t’i mbështetur ata në përmbushjen e nevojave të menjëhershme dhe menaxhimit të efektshëm të krizës,” tha Znj. Suokko gjatë kësaj ngjarjeje.

Natacha Gomes, ushtruesja e detyrës e të ngarkuarës me punë në Ambasadën e Luksemburgut në Prishtinë tha se si partner tash e sa kohë, Luksemburgu mbështet Kosovën në luftën kundër Covid-19.

“Ngarkesa e sotme është pjesë e një përpjekjeje më të gjerë që ne po ndërmarrim së bashku me partnerët tanë të besuar siç është UNDP. Derisa ngadalë po kalojmë në faza të ndryshme të ngritjes graduale të kufizimeve, testimi bëhet edhe e më i rëndësishëm në mënyrë që të jemi në gjendje të mbajmë pandeminë nën kontroll dhe të veprojmë shpejt. Testimi me përfshirje të gjerë si dhe respektimi i masave të sigurisë janë mënyrat e vetme për të mbajtur nën kontroll COVID-19 dhe ne të gjithë duhet të kontribuojmë në këtë drejtim”.

Në ceremoni ishte e pranishme edhe Maria Suokko, përfaqësuese e Përhershme e UNDP-së.

Marrëveshja me Qeverinë e Luksemburgut përmes Lux Development S.A. kap vlerën e përgjithshme prej 1 milion euro nga e cila 460,000 EUR do të përdoren për blerjen e deri 20,000 testeve të zbulimit dhe ekstraktimit Covid-19 për Qendrën Klinike Universitare të Kosovës në Prishtinë.

Kjo do t’i mundësojë Ministrisë së Shëndetësisë të gjurmojë në mënyrë efikase përhapjen e virusit dhe të lokalizojë pikat kyçe të epidemisë, si bazë për parashikimin dhe planifikimin e strategjisë së kontrollit.

Shuma e mbetur e kontributit do të përdoret për ndihmë humanitare për familjet që janë prekur veçanërisht nga koronavirusi.