Zyrtarët e lartë të Hamasit – grupit radikal palestinez të shpallur organizatë terroriste nga SHBA – thanë të martën se një marrëveshje, për lirimin e pengjeve nga ana e tyre dhe lirimin e të burgosurve palestinezë nga Izraeli, mund të arrihet shumë shpejt.
Rreth 240 njerëz u rrëmbyen nga Hamasi në Izrael më 7 tetor dhe u dërguan në Gazë, sipas zyrtarëve izraelitë.
Izraeli, Shtetet e Bashkuara dhe Katari, i cili ndërmjetëson me Hamasin, kanë disa javë që bisedojnë për lirimin e pengjeve, si dhe për një armëpushim të përkohshëm në Rripin e Gazës dhe futjen e më shumë ndihmave humanitare në territorin e rrethuar.
Palestinezët kërkojnë për viktima në zonën e një sulmi izraelit ndaj shtëpive në kampin refugjat Xhabalia në Spitalin Indonezian, në veri të Gazës, 18 nëntor 2023.
Ushtria e Izraelit është duke e zgjeruar ofensivën e vet në veri të Gazës, ku zhvilloi luftime të ashpra me pjesëtarët e Hamasit në kampin e mbipopulluar të refugjatëve, Xhabalia, i cili është më i madhi në tërë Gazën.
Ushtria tha se forcat e saj po e “përgatitin fushëbetejën” në zonën e Xhabalias, në veri të Qytetit të Gazës, dhe se i kanë vrarë dhjetëra pjesëtarë të grupit radikal në ditët e fundit.
Ajo tha se i ka zbuluar tri boshte të tunelit ku luftëtarët po fshiheshin dhe se i shkatërroi raketahedhësit e tyre. Hollësitë e luftimeve nuk ka qenë e mundur të verifikohen në mënyrë të pavarur.
Një sulm në një spital të afërt i vrau 12 persona të hënën, kur trupat dhe tanket izraelite po luftonin me luftëtarët e Hamasit pranë tij.
Izraeli thotë se Hamasi i përdor civilët dhe spitalet si mburoja njerëzore, derisa kritikët thonë se rrethimi dhe bombardimet e pareshtura izraelite përbëjnë ndëshkim kolektiv për territorin e 2.3 milionë palestinezëve.
Më shumë se 12.700 palestinezë – dy e treta gra dhe fëmijë – janë vrarë prej se nisi lufta më 7 tetor, sipas autoriteteve shëndetësore palestineze, të cilat s’e bëjnë dallimin mes civilëve dhe lugëtarëve kur llogarisin viktimat. Raportohet se rreth 4.000 janë zhdukur.
Rreth 1.200 njerëz u vranë në Izrael, shumica gjatë sulmit të 7 tetorit, dhe rreth 240 u morën peng nga Hamasi./rel
Barella: Sot kundër një skuadre shumë të fortë dëshmuam se m...
Kurti: Të përkushtuar për të vërtetën dhe për drejtësi për t...
Shpërthimet në Liban, reagon kryeministri izraelit Netanyahu
Raportohet për një lëvizje të mundshme të Zhegrovës në të ar...
Biden pret të hënën homologun e Emirateve të Bashkuara Arabe...
Finlanda e mbron vendimin për të blerë armë izraelite