Presidenti ukrainas Volodymyr Zelensky mbërriti në Berlin të hënën mbrëma për bisedime me kancelarin gjerman Olaf Scholz dhe për të marrë pjesë në një samit për rindërtimin e vendit të tij.

“Kancelari Scholz dhe unë do të diskutojmë për ndihmën e vazhdueshme të mbrojtjes, zgjerimin e sistemit të mbrojtjes ajrore të Ukrainës dhe prodhimin e përbashkët të armëve”, tha Zelensky.

Qeveria gjermane miratoi kohët e fundit përdorimin e armëve të prodhimit gjerman nga ushtria ukrainase për të goditur objektivat në tokën ruse, diçka që ajo ka hezituar ta bëjë, ashtu si edhe vendet e tjera perëndimore, duke përmendur shqetësimet për përshkallëzimin.

Zelenskiy do të marrë pjesë sot dhe nesër në një samit për rindërtimin e Ukrainës, ku do të marrin pjesë përfaqësues të qeverive, duke përfshirë dhjetë kryeministra, si dhe kompani private.

“Prioriteti ynë i parë do të jenë zgjidhjet urgjente për sektorin energjetik të Ukrainës”, theksoi presidenti ukrainas.

“Unë do të takohem gjithashtu me Presidentin Federal Frank-Ëalter Steinmeier dhe Presidentin e Bundestagut Berbel Bass, dhe gjithashtu do të vizitoj një bazë ushtarake ku ushtarët tanë po trajnohen,” shtoi ai.

Zelensky do të jetë të shtunën dhe të dielën në Zvicër për të marrë pjesë në një samit të nivelit të lartë për paqen në Ukrainë me pjesëmarrjen e më shumë se 90 vendeve dhe organizatave, por jo Rusisë dhe Kinës./abcnews.al