Presidenti i Ukrainës Volodymyr Zelenskyy ka mbajtur një tjetër fjalim sonte, në atë që ai e përshkruan si “ditën e 18-të të luftës sonë për jetën, për Ukrainën, për pavarësinë”.

Ai ka folur për sulmin afër kufirit me Poloninë, duke thënë se “atje nuk është duke ndodhur asgjë që mund të kërcënojë territorin e Federatës Ruse”, transmeton portal arbresh.info

“Vitin e kaluar, unë i kam paralajmëruar liderët e NATO-s se nëse nuk do të kishte sanksione të ashpra parandaluese kundër Rusisë, do të fillonte një luftë. Kishim të drejtë”, tha ai.

“Kam thënë për një kohë të gjatë që Nord Stream është një armë që do të godasë Europën. Tani kjo është e qartë”, shtoi ai.

“Dhe tani e përsëris përsëri – nëse nuk e mbyllni qiellin tonë, është vetëm çështje kohe para se raketat ruse të bien në territorin tuaj. Territori i NATO-s. Në shtëpitë e qytetarëve të vendeve të NATO-s”, tha Zelensky.

Ai foli për vdekjen e gazetarit amerikan Brent Renaud, duke e cilësuar atë si një “sulm të qëllimshëm nga ushtria ruse”.

Ai foli edhe për vizitën e mëparshme në një spital ukrainas, ku po trajtohen ushtarët e plagosur, ndërsa ka theksuar se në atë spital po trajtohet edhe një ushtar rus nga Ryazan.

“Ai është në të njëjtin repart me mbrojtësit tanë, merr të njëjtën ndihmë nga të njëjtët mjekë.

Pavarësisht se çfarë po bënte ky djalë. Kundër nesh, kundër Ukrainës. Por mjekët ukrainas e shpëtuan. Dhe kjo është e qartë. Sepse ata janë njerëz. Jo egërsirat.Dhe ne duhet ta kalojmë këtë luftë që të mbetemi të gjithë njerëz”, shtoi ai.

Zelenskyy tha se Ukraina ndjen mbështetjen e vendeve të tjera, duke përmendur Bullgarinë, Sllovakinë, Republikën Çeke, Rumaninë, Poloninë dhe Britaninë.

Lidhur me përpjekjet për të organizuar një takim mes tij dhe presidentit rus Vladimir Putin, ai tha se kjo është “një rrugë e vështirë, por e nevojshme”.

Ai tha se disa korridore humanitare kishin qenë të suksesshme gjatë ditës, me përjashtim të dukshëm të Mariupolit, i cili u ndërpre nga trupat ruse.

“Por ne do të përpiqemi përsëri derisa të mund të ndihmojmë njerëzit tanë,” tha ai. “Sepse ata janë tanët. Mariupoli ynë. Mariupoli heroik”, tha ai.

“Ne po kalojmë kalvarin më të keq në historinë tonë, në jetën tonë. Ne mbrojmë gjënë më të çmuar që kemi. Duhet të mbajmë. Duhet të luftojmë. Dhe do të fitojmë. Unë e di këtë. Unë besoj në këtë”, përfundoi fjalimin e tij Zelensky./sky/arbresh.info/