Presidenti amerikan Joe Biden do të telefonojë mbretin Salman të Arabisë Saudite në prag të publikimit të planifikuar për nesër të raportit të inteligjencës amerikane që do të konfirmonte përfshirjen e djalit të tij, Princit të Kurorës Mohammed bin Salman, në vrasjen e gazetarit disident Jamal Khashoggi.

“Raporti, një dokument sekret i prodhuar nga udhëheqja e Inteligjencës Kombëtare dhe që pritet  publikohet nesër, nënkupton që Princi i Kurorës Mohammed bin Salman është i përfshirë në vrasjen dhe copëtimin e Khashoggi në konsullatën Saudite në Instabul në 2018”.

Të dy avionët privatë të përdorur nga një skuadër vrasjesh arabe Saudite që vranë dhe dyshohet se kanë copëtuar gazetarin Jamal Khashoggi ishin në pronësi të një kompanie që më pak se një vit më parë ishin të princit të fuqishëm të mbretërisë, Mohammed bin Salman, sipas dokumenteve të paraqitura kohët e fundit, raporton CNN.

Dokumentet, të paraqitura si pjesë e një procesi civil kanadez në fillim të këtij viti, janë etiketuar “Top Secret” dhe të nënshkruara nga një ministër Saudit i cili transmeton urdhrat e princit të kurorës, sundimtarit të ri de facto të Arabisë Saudite.

Regjistrimi përcakton se si pronësia e Sky Prime Aviation u urdhërua të transferohej në fondin e pasurisë sovrane të 400 miliardë dollarëve në fund të vitit 2017. Avionët e kompanisë u përdorën më vonë në vrasjen e Khashoggi në tetor 2018.

Fondi i pasurisë sovrane të Mbretërisë, i njohur si Fondi i Investimeve Publike, kontrollohet nga kurora Saudite dhe drejtohet nga princi i kurorës, i cili njihet si MBS. Dokumentet që krijojnë lidhjen midis avionëve dhe princit u paraqitën nga një grup i kompanive në pronësi të shtetit Saudit si pjesë e një padie përvetësimi që ata hapën muajin e kaluar në Kanada kundër një ish-zyrtari të lartë të inteligjencës Saudite, Saad Aljabri.

Bin Salman mohoi çdo përfshirje, por pranoi përgjegjësinë si udhëheqësi de facto i vendit. Nëse ndodh siç është planifikuar, ajo do të jetë thirrja e parë telefonike nga presidenti amerikan drejt mbretit saudit.

Biden ka vendosur të rregullojë marrëdhëniet me Riadin, madje duke zgjedhur sovranin si bashkëbisedues, dhe jo djalin e tij, siç kishte bërë më parë Donald Trump./arbresh.info/