Policia dhe Prokuroria gjermane ka theksuar se të shtunën një 38-vjeçar nga Bielefeld vdiq si pasojë e të shtënave në qendër të qytetit. Sipas këtyre institucioneve sutori ose autorët janë në arrati.

Në njoftim thuhet se sipas gjetjeve aktuale, viktima ndodhej në zonën e Obernstrasse Klasingstrasse, kur “një ose më shumë autorë janë afruar dhe kanë qëlluar”.

Policia thekson se shtetasi kosovar, ka vdekur në vendin e ngjarjes për shkak të plagëve të rënda.

“Një operacion i madh policor është duke u zhvilluar aktualisht në zonën e qytetit Bielefeld. Vijon kërkimi për autorin ose autorët”, thuhet në njoftim.

Siç bëjnë me dije policia dhe prokuroria nuk ka rrezik për palët e treta të papërfshira në këtë incident, që ka përfunduar me vrasje.

Policia thekson se hetimet po kryhen nga skuadra e vrasjeve “Ober” në krye me kryedetektivin Alexander Scholz.

Mediat kryesore gjermane kanë shkruar për rastin duke theksuar se bëhet fjalë për ish -bokserin kosovar Besar Nimani.

Boksieri shqiptar, Besar Nimani, është vrarë të shtunën në mbrëmje në Bielefeld të Gjermanisë. 38-vjeçari është qëlluar me të dalë nga një restorant.

Nimani në karrierën e tij si boksier ka garuar në kategorinë supervelter. Ka pasur 27 meçe, nga të cilat 26 fitore dhe një humbje. Nuk ka qenë aktiv që nga viti 2019./rtk