Edhe pas vdekjes, viktimat e koronavirusit vuajnë një izolim torturues në Selanik, në qytetin më të goditur nga pandemia në Greqi.

Deri më tani, më shumë se 300 njerëz janë varrosur në vende të ndara, thonë zyrtarët e Selanikut.

Efharis Gunser (85) vdiq në fund të gushtit, raporton Ekatimerini. Trupi i saj ishte mbështjellë me dy qese plastike dhe u vendos në një arkivol që ishte mbështjellur gjithashtu. Sipas rregullave të autoriteteve të qytetit, ajo nuk u varros pranë burrit të saj të ndjerë, por në pjesën e varrezave të rezervuara për njerëzit e infektuar me virusin. Varri i saj është i ndaluar për vizitorët, transmeton portal arbresh.info

Viktimat e pandemisë janë varrosur në varreza tjera të Selanikut dhe procedura fetare për ta bëhet në formë shumë të shkurtër, madje atyre u vendosen edhe shenja të vogla për t’u identifikuar nga të tjerët.

Në Greqi, ku shumica e varrezave janë të mbipopulluara, eshtrat zakonisht hiqen pas tre vjet varrosje dhe i çojnë në thesar, por viktimat e koronavirusit do të qëndrojnë të varrosura për 10 vjet.

Giorgos Avarlis, nënkryetari i Bashkisë së Selanikut, tha se autoritetet janë të shqetësuar se çantat dhe mbulesat e arkivolit mund të ngadalësojnë shpejtësinë e shpërbërjes së trupave të viktimave të pandemisë.

“Varrosja është rreptësisht e ndaluar diku tjetër,” citoi Ekatimerini të thoshte Avarlis. Ai gjithashtu vuri në dukje se njerëzit që vdiqën nga sëmundje seksualisht të transmetueshme u varrosën gjithashtu në pjesë të rezervuara të varrezave, por ky proces u ndalua disa dekada më parë.

Situata alarmante në Greqi për shkak të pandemisë filloi në fillim të muajit tetor, kur edhe kapacitetet spitalore u mbushën. Selaniku, qyteti i dytë më i madh në Greqi dhe zonat fqinje në veri të vendit pësuan pasojat më të mëdha. Për javë të tëra, qyteti ka raportuar një numër më të lartë ditor të rasteve të reja të koronavirusit sesa Athina, pavarësisht se ka dukshëm më pak banorë./arbresh.info/