Gjykata e Lartë shfuqizoi javën e shkuar ndalimin e përdorimit të një pajisjeje që u jep mundësi armëve gjysmë-automatike të qëllojnë me breshëri të ngjashme me mitralozët. Siç njofton korrespodenti i Zërit të Amerikës vendimi lë në qendër të debatit për zgjedhjet presidenciale çështjen e armëmbajtjes.

Këto pajisje blihen më vete dhe montohen për të intensifikuar breshërinë e armëve, duke qëlluar qindra plumba në një minutë. Ato u ndaluan nga ish-presidenti Trump në 2018 pas një sulmi në një festival muzikor në 2017 në Las Vegas, ku për pasojë u vranë 60 persona.

“Mëngjesin e sotëm përmbyllëm rregulloren e re për të ndaluar pajisjet që intensifikojnë breshëritë e armëve”, u shpreh zoti Trump.

Autori i sulmit përdori një pajisje të tillë dhe qëlloi pa ndërprerje me më shumë se 1 mijë plumba nga dritarja e një hoteli.

Shumica konservatore e Gjykatës së Lartë tha në vendimin e saj se administrata e zotit Trump tejkaloi autoritetin e saj kur e shpalli të jashtëligjshëm përdorimin e këtyre pajisjeve.

Vendimi i Gjykatës e mban çështjen e përdorimit të armëve në qendër të fushatës presidenciale.

Ekipi i fushatës elektorale të ish-presidentit Trump tha se amerikanët duhet të respektojnë vendimin e gjykatës. Të premten, zoti Trump u tha të pranishmëve të mbledhur për të festuar ditëlindjen e tij në Florida, se rizgjedhja e tij do të bëjë të mundur mbrojtjen e të drejtave lidhur me armët, që mundëson Amendamenti i Dytë i Kushtetutës.

“Është e nevojshme që njerëzit, armëmbajtësit të votojnë. Sepse po nuk votuat, nuk do ta mbani dot armën dhe për shumë kohë, sepse ata duan t’ju marrin gjithçka. Ata duan t’ju heqin armët. Ata duan t’ju marrin municionet. Ata duan ta shkatërrojnë Amendamentin e Dytë”, ka thënë zoti Trump.

Ekipi i fushatës elektorale të presidentit Biden i bëri thirrje Kongresit të rikthejë në fuqi ndalimin e pajisjeve që intensifikojnë breshërinë e armës.

“Ka një kontrast të qartë midis qëndrimit tonë dhe ish-presidentit. Të mos harrojmë, ish-presidenti tha fjalë për fjalë tha se njerëzit duhet ta pranojnë vendimin dhe të vazhdojnë përpara. Por kjo lidhet me çështjen e dhunës me armë në SHBA. Duhet ta marrim seriozisht. Le ta kuptojmë se të gjithë kemi fuqinë të luajmë rolin tonë në këtë çështje”, tha nënpresidentja Kamala Harris.

Përkrahësit e zotit Trump në Kongres mbështesin të drejtat e armëmbajtësve për të përdorur pajisjet që intensifikojnë breshërinë e armëve.

“Kjo pajisje u shërben atyre që janë dëmtuar nga armët, por që vazhdojnë t’i përdorin ato në mënyrë aktive. Kjo nuk do të thotë se ata do të shtien duke patur si objektiv qytetarët. Kjo nuk ka ndodhur kurrë”, tha Byron Donalds, ligjvënës republikan.

Përkrahësit e zotit Biden në Kongres thonë se vendimi i Gjykatës së Lartë do të çojë në humbjen e më shumë jetëve.

“Nuk ka asnjë dyshim se do ketë tragjedi të tjera për shkak të këtyre pajisjeve. Dhe ne duhet të pyesim veten se përse është e nevojshme një gjë e tillë”?, thotë Adam Schiff, ligjvënës demokrat

Sipas të dhënave të qendrës së anketimit Pew Research, gati një e treta e amerikanëve thonë se zotërojnë një armë.

Përpara zgjedhjeve të nëntorit, Gjykata e Lartë pritet të vendosë edhe për një çështje që ka në qendër të drejtën e armëmbajtjes për individë ndaj të cilëve janë vendosur urdhra ndalimi për shkak se kanë ushtruar dhunë në familje.