Në Shtetet e Bashkuara të Amerikës, Uber është paditur nga 550 gra, që dyshohet se janë sulmuar seksualisht nga shoferët në platformën e udhëtimit.

Dokumenti përfshin pretendime se gratë pasagjere “janë rrëmbyer, sulmuar seksualisht, dhunuar seksualisht, përdhunuar, burgosur në mënyrë të rreme, përndjekur, ngacmuar ose sulmuar ndryshe nga shoferët e Uber”, shkruan BBC, transmeton arbresh.info.

Çështja u depozitua në Gjykatën e Lartë të Qarkut të San Franciskos të mërkurën.

“Sulmet seksuale janë një krim i tmerrshëm dhe ne e marrim seriozisht çdo raportim”, tha një zëdhënës i Uber për BBC.

“Nuk ka asgjë më të rëndësishme se siguria, prandaj Uber ka ndërtuar veçori të reja sigurie, ka vendosur politika të përqendruara te të mbijetuarit dhe ka qenë më transparent në lidhje me incidentet serioze. Ndërsa ne nuk mund të komentojmë mbi çështjet gjyqësore në pritje, ne do të vazhdojmë ta mbajmë sigurinë në zemrën e punës sonë”, shtoi ai.

Padia pretendon se qysh në vitin 2014 Uber u bë i vetëdijshëm se drejtuesit e saj po sulmonin dhe përdhunonin seksualisht pasagjeret femra.

Por dosjet pretendojnë se kompania i jepte përparësi “rritjes mbi sigurinë e klientit”.

Muajin e kaluar, Uber publikoi Raportin e dytë të Sigurisë në SHBA, i cili tregoi se kishte 998 incidente të sulmeve seksuale, përfshirë 141 raporte përdhunimi, në vitin 2020.

Në raport, kompania tha se kishte marrë gjithsej 3,824 raporte për pesë kategoritë më të rënda të sulmeve seksuale midis 2019 dhe 2020.

Raporti i parë i sigurisë i firmës, i cili detajon incidentet nga viti 2017 deri në vitin 2018, gjeti 5,981 raportime për sulme seksuale.

Kategoritë më serioze të sulmeve seksuale të Uber-it variojnë nga “puthja jo-konsensuale e një pjese të trupit jo-seksuale” deri te “depërtimi seksual jo-konsensual” ose përdhunimi.