Njeriu në qendër të negociatave për një armëpushim në Gaza ka thënë për Sky News se Donald Trump dëshiron që një marrëveshje të arrihet përpara se të marrë pushtetin në janar.

Kryeministri i Katarit shprehu optimizëm të kujdesshëm, por tha se kërkonte “presion maksimal” mbi të gjitha palët për t’i dhënë fund luftimeve.

Mohammed bin Abdulrahman bin Jassim al Thani theksoi se këshilltarët e Trump dhe administrata e ardhshme kanë thënë se duan që situata të zgjidhet deri në inaugurimin e tij më 20 janar, shkruajnë mediat e huaja, përcjell Telegrafi.

“Ne po përpiqemi të bashkërendojmë me ta përpjekjet tona dhe të gjithë jemi dakord dhe shpresojmë ta kalojmë këtë situatë përpara se presidenti të shkojë në zyrë”, tha ai.

Kryeministri tregoi se ekipi i Trump “dëshiron që kjo të zgjidhet tani – dhe sot”.

Al Thani gjithashtu mbrojti Hamasin që lejohet të vazhdojë të funksionojë zyrën e tij politike nga Doha, kryeqyteti i Katarit.

Ai theksoi se ishte krijuar “me transparencë dhe koordinim të plotë dhe me kërkesë të SHBA-së dhe Izraelit në atë kohë që kjo të përdoret si një platformë negocimi”.

Sipas tij, armëpushime të shumta ishin ndërmjetësuar përmes zyrës që nga viti 2014.

Kujtojmë se negociatat për një armëpushim në Gaza deri më tani kanë rezultuar të pasuksesshme, me më shumë se 44,500 palestinezë të vrarë në luftë, sipas ministrisë së shëndetësisë të drejtuar nga Hamasi.

Izraeli është zotuar të zhdukë Hamasin pasi grupi vrau rreth 1200 njerëz dhe mori më shumë se 200 pengje në sulmin e tij terrorist të tetorit 2023.

Rreth 100 pengje janë ende brenda Gazës – por të paktën një e treta besohet të jenë të vdekur.

Të hënën, Donald Trump tha se do të kishte “një çmim të lartë për t’u paguar” nëse pengjet nuk liroheshin përpara se ai të rihynte në Shtëpinë e Bardhë.

“Ata që janë përgjegjës do të goditen më fort se kushdo është goditur në historinë e gjatë dhe të rrëfyer të Shteteve të Bashkuara të Amerikës”, shkroi ai në faqen e tij “Truth Social”.

Duke folur për atë që do të thotë rizgjedhja e Trump për Lindjen e Mesme – përfshirë marrëdhëniet me Iranin – kryeministri i Katarit tha se kishte “shumë rreziqe”, por “shumë mundësi”.

“Shpresoj që të gjithë t’i shohin këto mundësi”, shtoi ai. /Telegrafi/