Mbajtësi i një të pestës së ujit të ëmbël në botë, Amazona, po fillon sezonin e thatë me shumë nga lumenjtë e saj tashmë në nivele kritike të ulëta, duke i shtyrë qeveritë të ndërmarrin masa emergjente për të adresuar çështjet që variojnë nga lundrimi i ndërprerë deri tek rritja e zjarreve në pyje.

Bëhet e ditur se Amazona po përballet me një nga thatësirat më të rënda në vitet e fundit me ndikime të rëndësishme në disa vende anëtare, thuhet në një deklaratë nga Organizata e Traktatit të Bashkëpunimit në Amazonë, e cila përfshin Bolivinë, Brazilin, Kolumbinë, Ekuadorin, Guajanan, Perunë, Surinamin dhe Venezuelën.

Në disa lumenj në Amazonën jugperëndimore, nivelet e ujit janë më të ulëtat të regjistruar për këtë periudhë të vitit.

Historikisht, muajt më të thatë janë gushti dhe shtatori, kur zjarri dhe shpyllëzimi arrijnë kulmin.

Ndërsa deri më tani vendet më të prekura janë Bolivia, Peruja dhe Brazili, agjencia federale e ujit të Brazilit dekretoi një mungesë uji në dy pellgje kryesore, Madeira dhe Purus, të cilat mbulojnë një zonë gati sa madhësia e Meksikës.

Ndërkohë Acre shpalli një gjendje emergjente mes një mungese uji në qytetin e tij kryesor, shkruan AP, përcjell Telegrafi.

Këta hapa u ndërmorën më shumë se dy muaj më herët se në vitin 2023, kur pjesa më e madhe e pellgut të Amazonës pësoi thatësirën më të keqe të regjistruar, duke vrarë dhjetëra delfinë lumenjsh, duke mbytur qytete me tym për muaj të tërë dhe duke izoluar mijëra njerëz që vareshin nga transporti ujor.

Siç raportohet, masat përdoren për të rritur monitorimin, për të mobilizuar burimet dhe personelin dhe për të kërkuar ndihmë federale.

Thellësia e lumit Madeira, një nga degët më të mëdha të Amazonës dhe një rrugë ujore e rëndësishme për sojë dhe karburant, shkoi nën 3 metra pranë Porto Velho më 20 korrik.

Në vitin 2023, kjo ndodhi më 15 gusht.

Lundrimi ka qenë i kufizuar gjatë natës, dhe dy nga hidrocentralet më të mëdha të Brazilit mund të ndalojnë prodhimin, siç ndodhi vitin e kaluar.

Në qytetin Envira, lumenjtë janë bërë shumë të cekët për të lundruar.

Zyrtarët lokalë u kanë kërkuar pleqve dhe grave shtatzëna që të lëvizin nga komunitetet e lumenjve në qendër të qytetit, sepse përndryshe ndihma mjekësore mund të mos jetë në gjendje t’i arrijë ata.

Fermerët që prodhojnë miell nuk mund ta nxjerrin atë në treg. Si rezultat, ky produkt ushqimor i Amazonës është më shumë se dyfishuar në çmim, sipas administratës lokale.

Një shqetësim tjetër është zjarri.

Ka pasur rreth 25,000 zjarre nga janari deri në fund të korrikut – numri më i lartë për këtë periudhë në pothuajse dy dekada.

Në Amazonë, zjarret janë kryesisht të shkaktuara nga njeriu dhe përdoren për të menaxhuar kullotat dhe pastrimin e zonave të shpyllëzuara.

Në Acre thatësira ka shkaktuar tashmë mungesë të furnizimit me ujë në disa zona të kryeqytetit të Rio Branco.

Këto komunitete tani varen nga uji i transportuar me kamionë, një problem i përjetuar vitin e kaluar.

Midis thatësirave, përmbytjet e rënda goditën 19 nga 22 bashkitë e shtetit.