Temperaturat e acarta në disa pjesë të Shteteve të Bashkuara kanë rritur në maksimum kërkesat për energji, ndërsa shtëpitë dhe bizneset konsumuan një sasi rekord gazi natyror për ngrohje dhe prodhimin e energjisë.

Këtë javë reshjet e shumta të dëborës mbuluan një pjesë të madhe të Shteteve të Bashkuara, duke çuar në mbylljen e një rafinerie në Teksas, probleme funksionimi për disa të tjera dhe përgjysmimin e prodhimit të naftës në shtetin e Dakotës së Veriut.

Rrjeti i energjisë elektrike “Tennessee Valley Authority” në pronësi të qeverisë amerikane tha se mëngjesi i së mërkurës shënoi pikën kulmore të përdorimit të energjisë me 34,526 megavat, duke tejkaluar rekordin e gushtit të vitit 2007.

Operatori më i madh amerikan i rrjetit elektrik “PJM Interconnection” i cili mbulon mbi 12 shtete që nga Illinoi deri në Nju Xhersi tha se rrjeti do të ishte shumë i ngarkuar deri më 22 janar, kur temperaturat pritet të ngrihen.

Pavarësisht disa ndërprerjeve të izoluara dhe ngrirjes së puseve, sistemet e energjisë dhe gazit në vend i kanë mbajtur gjerësisht dritat ndezur dhe gazi ka shkuar pa ndërprerje tek konsumatorët.

Një ngricë në shkurt të vitit 2021 la miliona njerëz pa energji, ngrohje dhe ujë në Teksas dhe shtete të tjera qendrore amerikane, për ditë të tëra dhe shkaktoi më shumë se 200 të vdekur.

Gjatë fundjavës temperaturat ranë në minus 18 gradë Celsius në disa shtete amerikane./voa