Ndërsa Ministria e Arsimit e Spanjës njoftoi planet e vendit për t’i rihapur shkollat në shtator, Ministria e Shëndetësisë sot raportoi 427 raste të tjera me koronavirusin e ri (COVID-19), raporton Anadolu Agency (AA).

Deri më tani, Spanja ka konfirmuar 242.707 raste, ndërsa numri i të vdekurve nuk është përditësuar në mënyrë të duhur tashmë disa javë.

Shifra e përgjithshme është rritur me vetëm tre për të arritur në 27.136 gjatë shtatë ditëve të fundit, megjithëse Ministria e Shëndetësisë raportoi se 32 njerëz kanë vdekur gjatë javës së fundit.

Fernando Simon, epidemiologu kryesor i Spanjës, tha këtë javë se të dhënat duhet të rregullohen “së shpejti”.

Ministrja spanjolle e Arsimit, Isabel Celaa, gjithashtu e shpalosi planin e shumëpritur të qeverisë për vitin e ardhshëm shkollor.

Ajo tha në një konferencë për shtyp se të gjithë nxënësit dhe mësuesit do të duhet të kthehen fizikisht në klasë në shtator.

“Klasat online nuk mund të zëvendësojnë mësimin prezantues”, tha ajo.

Klasat do të jenë të kufizuara në 20 nxënës, ndonëse plani thotë që 15 është shifra ideale. Nxënësit në arsimin parashkollor deri në klasën e katërt nuk do të duhet të mbajnë maska ​​ose të ruajnë distancën fizike, por ata do të izolohen nga nxënësit më të mëdhenj në moshë.

Fëmijët në klasën e pestë ose më lartë do të duhet të mbajnë maska ​​në çdo situatë në të cilën distanca do të jetë më pak se 1,5 metër.

Plane të emergjencës do të zbatohen në rast të një vale të dytë të infeksioneve, të cilat do t’i jepnin përparësi vazhdimit të procesit arsimor për nxënësit nën moshën 14-vjeçare.

Sipas ministres Celaa, të gjithë liderët rajonalë të Spanjës janë pajtuar me planin, përveç atyre nga Madridi dhe rajoni Bask.