Shtetet e Bashkuara të Amerikës kanë paralajmëruar Izraelin se organizimi i një ofensive ushtarake në qytetin jugor të Gazës, Rafah, pa planifikimin e duhur do të ishte një katastrofë.

Rreth 1.5 milionë palestinezë po mbijetojnë në qytetin në kufi me Egjiptin në kushte të rënda humanitare. Shtëpia e Bardhë tha se nuk do të mbështesë operacione të mëdha pa arritur kushtet e duhura për refugjatët atje.

Komentet vijnë disa ditë pasi udhëheqësi izraelit tha se ushtrisë i ishte thënë të përgatitej për të operuar në Rafah.

Zyrtarë nga Ministria e Shëndetësisë e drejtuar nga Hamasi njoftuan se sulmet ajrore të raportuara izraelite në Gaza këtë të premte vranë të paktën 15 persona, përfshirë tetë në Rafah.

Shumica e palestinezëve në Rafah janë zhvendosur nga luftimet nga pjesë të tjera të Gazës dhe jetojnë në tenda.

Garda al-Kourd, një nënë e dy fëmijëve, e cila tha se ishte zhvendosur gjashtë herë gjatë luftës, tha për BBC se ajo priste një sulm izraelit, por shpresonte se do të kishte një marrëveshje armëpushimi përpara se të ndodhte.

“Nëse ata vijnë në Rafah, do të jetë fundi për ne, sikur po presim vdekjen. Nuk kemi ku të shkojmë“, tha ajo./rtsh.al/