Republikanët dhe demokratët janë në një garë të ngushtë për kontrollin e Kongresit amerikan, ndërsa numërimi vazhdon pas zgjedhjeve afatmesme.

Republikanët janë favorit për të fituar Dhomën e Përfaqësuesve, por lufta për Senatin është në teh të thikës, shkruan BBC.

Demokratët fituan një vend kyç në Senat në Pensilvani dhe rezultatet e disa garave të tjera të ngushta ende nuk janë shpallur, teksa sondazhet e daljes sugjerojnë se ekonomia dhe inflacioni ishin shqetësimet më të mëdha për votuesit.

Megjithëse presidenti Joe Biden, një demokrat, nuk është në fletëvotim, zgjedhjet e ndërmjetme do të formësojnë fatin e agjendës së tij.

Nëse demokratët humbasin kontrollin e Dhomës ose Senatit, republikanët do të jenë në gjendje të bllokojnë planet e tij.

Ish-presidenti Donald Trump, i cili pritet të njoftojë se do të kandidojë për president në vitin 2024, ka hasur në dështimin e disa prej kandidatëve të tij.

Në një nga garat më të ndjekura në Senat, demokrati i krahut të majtë John Fetterman ,i cili po shërohet nga një goditje në tru mundi mjekun e famshëm Mehmet Oz të mbështetur nga Trump në Pensilvani.

Një tjetër garë kritike për Senatin, midis demokratit Raphael Warnock dhe kundërshtarit republikan Herschel Walker në Gjeorgji, mund të përfundojë në një balotazh pas katër javësh nëse asnjëri nga kandidatët nuk merr më shumë se 50% të votave, një mundësi që duket e mundshme.

Ndërkohë, kandidatja demokrate në Gjeorgji, Stacey Abrams, ia pranoi garën guvernatorit republikan, Brian Kemp.

Zgjedhjet u zhvilluan pa probleme në të gjithë vendin, aborti ishte shqetësimi kryesor për votuesit demokratë, ndërsa republikanët dhe të pavarurit e vlerësuan inflacionin si çështjen e tyre kryesore. /arbresh.info/