Shtetet e Bashkuara të enjten akuzuan pesë zyrtarë të inteligjencës ruse dhe një civil rus për një komplot për të kryer sulme kibernetike kundër Ukrainës dhe aleatëve të saj.

Kjo konsiderohet si një përpjekje për të penguar Ukrainën në luftën e vazhdueshme të nisur kundër saj nga Rusia në shkurt të vitit 2022.

Në një aktakuzë të rishikuar të pavulosur të enjten, Departamenti i Drejtësisë tha se një njësi kibernetike e agjencisë së inteligjencës ushtarake të Rusisë kreu “operacione kibernetike në shkallë të gjerë” duke filluar që nga viti 2020, përpara pushtimit rus të Ukrainës në shkurt të vitit 2022.

Aktakuza origjinale, e ngritur në qershor në Gjykatën e Qarkut të SHBA-së për Distriktin e Maryland, përmendte vetëm një të pandehur, Amin Stigal.

Ai akuzohet për komplot me agjencinë e inteligjencës ushtarake të Rusisë, e njohur si Drejtoria kryesore e Inteligjencës së Shtabit të Përgjithshëm, ose GRU, për të nisur sulme kibernetike kundër sistemeve kompjuterike në Ukrainë dhe vende të tjera, duke përfshirë një rrjet kompjuterik të mbajtur nga një agjenci e paidentifikuar amerikane në Maryland, shkruan Reuters, transmeton Klankosova.tv.

Lajmet e së enjtes vijnë vetëm një ditë pasi ShBA-ja ndërmori disa veprime ligjore kundër Rusisë për të luftuar përpjekjet e supozuara për ndërhyrje në zgjedhjet presidenciale të vitit 2024, duke përfshirë akuzimin e dy punonjësve të rrjetit shtetëror të medias rus RT dhe sanksionimin e RT dhe redaktorit të saj kryesor të rrjetit.