SHBA-të iu bashkuan rivalëve Kinës dhe Rusisë për t’u bërë thirrje talebanëve që të ndërpresin lidhjet me grupet terroriste dhe t’i ndalojnë ata të veprojnë në Afganistan pas një vale të fundit sulmesh që kanë qenë të lidhura kryesisht me Shtetin Islamik.

Shtytja e bashkërenduar nga këto fuqi botërore dhe Pakistani, i njohur si “trojka e zgjeruar”, për të siguruar që talebanët të përmbushin angazhimet e tyre pas një takimi në Islamabad të enjten dhe sinjalizon shqetësimin në rritje të një përhapjeje të aktiviteteve terroriste në rajon. Grupi u takua gjithashtu me përfaqësues të lartë talebanë në margjinat e takimit, transmeton arbresh..info.

Trojka e zgjeruar u bëri thirrje talebanëve që të eliminojnë grupet terroriste në Afganistan në një “mënyrë vendimtare”, duke treguar gjithashtu shqetësim për situatën e rëndë humanitare dhe ekonomike në vend, tha Departamenti i Shtetit i SHBA, shkruan Bloomberg.

Grupi i vendeve “ranë dakord të vazhdojnë angazhimin praktik me talebanët për të inkurajuar zbatimin e politikave të moderuara dhe të matura që mund të ndihmojnë në arritjen e një Afganistani të qëndrueshëm dhe të begatë sa më shpejt të jetë e mundur”, tha Departamenti i Shtetit në një deklaratë.

Gjithashtu përshëndeti angazhimin e talebanëve për të lejuar kalimin e sigurt për të gjithë ata që udhëtojnë drejt dhe nga Afganistani dhe bëri thirrje për qasje të papenguar humanitare.

Deklarata vjen disa ditë pasi Pakistani tha se kishte arritur një marrëveshje armëpushimi me Tehreek-e-Taliban, dega lokale e grupit militant afgan, që ka shtuar sulmet dhe është inkurajuar nga homologu i tij që erdhi në pushtet në Kabul në gusht.

Islamabadi është i shqetësuar se kontrolli i talebanëve në Afganistan do të rrisë paqëndrueshmërinë në rajon. Në gusht, 35 sulme militante në Pakistan vranë të paktën 52 civilë, shifra më e lartë mujore që nga shkurti i vitit 2017. Ndërkohë, SHBA-ja është e shqetësuar për zhvillimin e kapacitetit të Shtetit Islamik dhe Al-Kaedës për të nisur sulme nga Afganistani./arbresh.info/