SHBA do të përcaktojë kartelet meksikane të drogës si organizata terroriste, tha të martën presidenti amerikan Donald Trump, pasi grupet e dhunshme vazhdojnë të mbajnë kontroll të fortë dhe vdekjeprurës në vendin e Amerikës Latine, transmeton Anadolu Agency (AA).

“Nuk dua të them se çfarë do të bëj, por ato do të përcaktohen”, tha Trump në një intervistë me ish-gazetarin e Fox News, Bill O’Reilly, duke shtuar se udhëheqësia e Meksikës hodhi poshtë ofertën e tij “për të na lënë të hyjmë dhe të pastrojmë”.

Në fillim të këtij muaji, Trump i ofroi ndihmë Meksikës pasi nëntë anëtarë amerikanë të komunitetit Mormon u vranë në një pritë vdekjeprurëse nga njerëz të dyshuar të karteleve të drogës në një autostradë meksikane.

Komuniteti LeBaron, një pjesë e komunitetit Mormon që u shkëput nga Kisha Mormon dhe formoi një sekt në Meksikë, plotësoi një peticion të hënën duke i kërkuar administratës së Trumpit të radhiste kartelet e drogës meksikane si organizata të huaja terroriste.

Në peticion thuhet se kartelet “kontrollojnë fluksin e drogave të paligjshme në SHBA nga Meksika, përfshirë heroinën, metamfetaminën, kokainën dhe fentanilin ultra vdekjeprurës”.

“Kështu që ju do të përcaktoni kartelet meksikane si grupe terroriste?”, pyeti O’Reilly.

“Po, do ta bëj. Do t’i përcaktoj kartelet. Absolutisht”, tha Trump, duke shtuar se ka punuar në këtë për 90 ditët e fundit.

“E dini, përcaktimi nuk është aq i lehtë, ju duhet të kaloni përmes një procesi dhe jemi mirë në atë proces”, shtoi ai.

“Prisni dhe shikoni – ata do t’ju sulmojnë që do ta bëni atë”, tha O’Reilly.

“Nuk më intereson. Unë jam sulmuar për çdo gjë”, tha Trump.

Meksika ka qenë e rrethuar prej kohësh nga dhuna vdekjeprurëse me kartelet e drogës dhe bandat kriminale që luftojnë për kontrollin e territoreve.