Shefi i NATO-s, Jens Stoltenberg, po arrin tani në atë që ai e quan një takim historik, pjesërisht për shkak të marrëveshjes së djeshme mes Turqisë dhe Suedisë, që do të thotë se Turqia do të vazhdojë me aplikimin e Suedisë në NATO.

“Është mirë për Suedinë, për Turqinë, për të gjithë aleatët dhe vendet baltike në rajon”, tha Stoltenberg për mediat e huaja.

Shefi i NATO-s vazhdon të flasë për vendimet që do të merren në lidhje me Ukrainën dhe anëtarësimin e mundshëm të vendit në NATO. Kjo përfshin, ndër të tjera, vendosjen për një paketë të re të mbështetjes ushtarake për Ukrainën, por edhe shkurtimin e procesit të Ukrainës për t’u bërë anëtare e NATO-s, nga një proces me dy hapa në vetëm një hap.

Presidenti ukrainas Volodymyr Zelenskyy do të marrë pjesë nesër në takim.

“Pres që aleatët të dërgojnë një mesazh të qartë, të bashkuar dhe pozitiv për rrugën e Ukrainës drejt anëtarësimit në NATO”, deklaroi Stoltenberg.

Stoltenberg komenton gjithashtu vendosjen e armëve bërthamore nga Rusia në Bjellorusi.

“Retorika e Rusisë rreth armëve bërthamore është e papërgjegjshme dhe e rrezikshme. Aleatët e NATO-s po vëzhgojnë nga afër se çfarë po bën Rusia, deri më tani nuk kemi parë ndonjë ndryshim pas vendosjes së armëve bërthamore nga Rusia në Bjellorusi që kërkojnë ndryshime nga ne. Por ne do të vazhdojmë të jemi vigjilentë”, tha Stoltenberg.

Stoltenberg: Sigurisht që Turqia dhe Suedia do t’i përmbahen marrëveshjes

Stoltenberg u përgjigjet edhe pyetjeve rreth marrëveshjes që u arrit dje mes Turqisë dhe Suedisë. Shefi i NATO-s tha se marrëveshja bazohet në marrëveshjen e arritur në vitin e kaluar në Madrid, midis Suedisë, Finlandës dhe Turqisë, me pika shtesë, krijimi i një mekanizmi të ri bashkëpunimi kundër terrorizmit midis Suedisë dhe Turqisë.

“Jam i sigurt se Turqia dhe Suedia do t’i përmbahen marrëveshjes”, tha Stoltenberg për mediat skandinave.

“Kemi hapur rrugën që Suedia të bëhet anëtare e plotë dhe dua të falënderoj Erdoganin”, vijon Stoltenberg./rtk