Rreth 25 milionë banorët e Bullgarisë dhe Rumanisë tani i bashkohen afro 450 milionë qytetarëve të BE-së, të cilët tashmë kanë lirinë për të lëvizur nëpër zonën Shengen, pasi kontrollet kufitare tokësore u hoqën zyrtarisht.

BE votoi në 12 dhjetor për të hequr kontrollet e brendshme të kufirit tokësor me Rumaninë dhe Bullgarinë, duke i lejuar ato të bashkohen me Zonën Shengen.

Kështu, të dy vendet do t’i bashkohen zyrtarisht Zonës Shengen si anëtarë të plotë më 1 janar 2025, duke mbyllur një kapitull që filloi në vitin 2011, kur Komisioni Evropian përcaktoi për herë të parë gatishmërinë e tyre për anëtarësim.

Me këtë, radhët e gjata në 30 kufijtë tokësorë midis Rumanisë dhe Bullgarisë së shpejti do t’i përkasin së shkuarës, megjithëse kontrollet e rastësishme të dokumenteve do të vazhdojnë për ca kohë për të ndihmuar në parandalimin e krimit.

Rumunët janë të kënaqur me këtë vendim, pasi presin të kursejnë një sasi të konsiderueshme kohe kur udhëtojnë jashtë vendit me makinë, duke mos pasur më nevojë të presin me orë të tëra në kontrollet kufitare.

Radhët e gjata patën një ndikim të madh tek ata që transportonin mallra, të cilët mund të kalonin ditë në kufi, duke humbur kohë dhe para.

Pranimi i Rumanisë dhe Bullgarisë në Zonën Shengen u bllokua nga Austria në vitin 2023 për shkak të shqetësimeve për migrimin e parregullt dhe Bullgaria u përball gjithashtu me kundërshtimin e Holandës.

Rumania filloi negociatat për të hyrë në Zonën Shengen në vitin 2011 kur vendi plotësoi zyrtarisht kushtet e pranimit.

Zona Shengen, një nga arritjet më të prekshme të integrimit evropian, aktualisht përfshin 29 vende dhe afro 450 milionë njerëz. /Telegrafi/