Lideri i rrëzuar i Katalonjës, Carles Puigdemont ka thënë se shumica e katalonasëve do të pranonin që të jenë pjesë e një lloji të sistemit federal zviceran.

“Nëse Spanja propozon një model sikur ky i Zvicrës, unë mendoj që do të jetë një ide në të cilën ne mund të punojmë dhe me gjasë shumica e katalonasëve do të bindeshin”, u shpreh ai, në një intervistë për mediumin zviceran publik RTS.

Zvicra është e ndarë në kantone apo shtete federale që gëzojnë pavarësi dhe autonomi konsiderueshëm të rëndësishme.

Sipas Puigdemont, nëse Spanja do të ndahej në këso linja, atëherë asnjëri nga problemet e tanishme nuk do të ekzistonin.

Ai është duke qëndruar në Belgjikë ku kërkoi azil pasi parlamenti i Katalonjës shpalli pavarësinë në mënyrë të njëanshme me 27 tetor 2017. Nëse kthehet në Spanjë, ai rrezikon të arrestohet.

“Unë besoj që shumica e separatistëve të Katalonjës e kanë bërë të qartë përgjatë 40 viteve të fundit se është e mundur që të punojmë brenda një kornize autonome”, u shpreh tutje Puigdemont.

55 vjeçari gjatë këtij muaji formalisht ka braktisur mundësinë që të zgjidhet përsëri president i Katalonjës, mirëpo në këtë intervistë ai nuk thotë se ka hequr tërësisht dorë nga synimi për të udhëhequr me Katalonjën.