Ish-strategu i ish-presidentit amerikan, Trump, Steve Bannon është akuzuar për përbuzje të Kongresit pasi refuzoi të jepte dëshmi për trazirat në Kongresin amerikan.

Ai u thirr për të dëshmuar për atë që dinte për planet për protestën që përfundoi me sulmin në Kongres, raporton cnn.

Dhoma e Përfaqësuesve votoi muajin e kaluar për ta dërguar çështjen në departamentin e drejtësisë, i cili zgjodhi të premten të ndjekë penalisht 67-vjeçarin. Ai mund të përballet me një vit burg dhe një gjobë prej 100 mijë dollarë.

Ndërkohë, Trump u ka kërkuar ish-ndihmësve të tij që të refuzojnë të gjitha kërkesat për t’iu nënshtruar depozitimeve. Ai argumentoi se ata kanë të drejtë të fshehin informacionin për shkak të privilegjit ekzekutiv – një parim ligjor që mbron shumë komunikime të Shtëpisë së Bardhë.

Gjykata e Apelit në Uashington është planifikuar të mbajë një seancë dëgjimore në fund të këtij muaji për të vendosur mbi pretendimin e Trumpit për privilegj ekzekutiv, pasi ai u refuzua nga një gjykatë më e ulët.

Ish-presidenti po përpiqet gjithashtu të bllokojë një grumbull të dhënash telefonike, regjistrat e vizitorëve dhe dokumente të tjera të Shtëpisë së Bardhë që hetuesit e Kongresit po ndjekin për hetimin e tyre për trazirat në Capitol. Presidenti Biden ka argumentuar se privilegji ekzekutiv nuk zbatohet në këtë rast.

Kujtojmë se mbështetësit e Trumpit bastisën ndërtesën e Kongresit të SHBA më 6 janar, ndërsa ligjvënësit po mblidheshin për të vërtetuar rezultatin e zgjedhjeve.

Trump, një republikan, ka refuzuar të pranojë humbjen e zgjedhjeve ndaj presidentit demokrat, Joe Biden vitin e kaluar, duke pretenduar – pa prova – për mashtrim masiv të votuesve.