Nga një hangar aeroporti, lart mbi kodrat e Huntingtonit në West Virginia, presidenti Donald Trump bëri të premten deklaratat e fundit për republikanët që garojnë në zgjedhjet e mesmandatit.

Por, në një shtet të cilin ai e fitoi bindshëm në vitin 2016, e përpara një turme më të nënshtruar sesa zakonisht, presidenti u duk të pranonte për herë të parë se republikanët mund të humbasin kontrollin e Dhomës së Përfaqësuesve.

“Kjo mund të ndodhë, – tha Trump. – Por ju e dini se çfarë bëni. Më kuptoni edhe çfarë dua të them. Mos u shqetësoni për këtë, unë thjesht do ta zgjidh”.

Presidenti foli mbi kandidaturën e Prokurorit të Përgjithshëm Patrick Morrisey për në Senat, si dhe garën e Carol Miller për Dhomën e Përfaqësuesve. Që të dy ata janë në një garë të përafërt dhe ndonjëherë edhe inferiorë, përballë demokratëve Richard Ojeda dhe senatorit Joe Manchin.

Trump e fitoi shtetin malor me një përqindje dërrmuese votash në zgjedhjet presidenciale, një fakt që presidenti mezi priste ta theksonte përpara turmës.

Pres. Trump says Democrats taking power in midterm elections "could happen."

"You know what you do? My whole life, you know what I say? 'Don't worry about it, I'll just figure it out." https://t.co/CFdzczE0fE pic.twitter.com/2oRP8AUEIK

— ABC News Politics (@ABCPolitics) November 2, 2018

“A e dini se për çfarë flitet? Ka dëgjuar ndonjëherë ndonjëri për 42 pikë përqindjeje?”, tha Trump, duke i rikujtuar kështu audiencës marzhin e lartë me të cilin fitoi kundër Hillary Clintonit.

Ndërkohë, teksa ndodhej në bordin e “Air Force One”, presidenti tha se kishte parë daljet në fushatë të ish-presidentit Barack Obama për demokratët në Florida, por pretendoi se Obama “kishte një turmë të vogël”.

“Isha në avion, nuk kisha se çfarë të bëja. E dëgjova atë teksa thoshte të vërtetën, – tha Trump. – E sërish, ai tha se ju mund ta mbani doktorin tuaj nëse e pëlqeni”, duke iu referuar kështu “Obamacare”.

Në ditën kur presidenti duhej të fliste për ekonominë, ai u fokusua tek emigracioni, Kavanaugh, qymyri dhe kujdesi shëndetësor, një temë tejet e nxehtë në shtetin malor të West Virginias.

“Të gjithë ata thonë se unë duhet të flas për ekonominë. Epo mirë, ne kemi ekonominë më të mirë në historinë e vendit tonë. Por ndonjëherë nuk është aq emocionuese të flasësh për ekonominë, apo jo? Kjo, sepse ne kemi shumë gjëra të tjera për të folur”, tha Trump.