Sot, Papa Françesku nderoi vjehrrat, të cilat shpesh janë viktimë e “klisheve” më të parëndësishme dhe u bëri thirrje atyre të bëjnë kujdes me gjuhën, sidomos në lidhje me nuset e tyre.

Audienca e përgjithshme e kësaj jave në Sheshin e Shën Pjetrit iu kushtua marrëdhënieve midis brezave dhe Papa pati një digresion të gjatë për “karakterin mitik” të vjehrrës, transmeton portal arbresh.info

“Vjehrra, nuk po them që e shohim si djall, por gjithmonë keqinterpretohet. Por, vjehrra është nëna e burrit dhe gruas tuaj”, tha ai.

“Ne themi për vjehrrat, sa më larg, aq më mirë, por edhe ajo është një nënë, është një e moshuar. Është një nga gjërat më të bukura që një grua të ketë nipër. Kur fëmijët e saj kanë fëmijë , ajo vjen sërish në jetë”, vazhdoi ai.

“Mbani lidhje me vjehrrat. Ndonjëherë ato janë pak të veçanta, por i kanë dhënë mëmësinë burrit tuaj. Bëjini ato të lumtura”, shtoi Papa.

Por, Papa nuk ndaloi dhe u dha një këshillë edhe vjehrrave.

“Ju lutem, bëni kujdes me gjuhën, sepse vetëm te gjuha janë mëkatet e vjehrrës”, tha ai.

Papa kërkoi falje për mbajtjen e audiencës së përgjithshme në një pozicion ulur për shkak të dhimbjes së gjurit që së fundmi e detyroi të anulonte disa angazhime./arbresh.info/