Shkencëtarët në Itali zbuluan koronavirusin e ri në sekretimin e fytit të një vogëlushi 4-vjeç, duke sugjeruar praninë e virusit në Itali që nga nëntori i vitit të kaluar, transmeton Anadolu Agency (AA).

Studimi i udhëhequr nga shkencëtarët në Universitetin e Milanos, analizoi tamponët orofaringeale të mbledhura nga 39 pacientë midis shtatorit 2019 dhe shkurtit 2020.

Kërkimi u publikua në fillim të kësaj jave nga revista mjekësore e pavarur editoriale “Sëmundjet e reja infektive”.

Përhapja e parë e COVID-19 u raportua në Wuhan të Kinës, në dhjetor të vitit të kaluar, megjithëse autoritetet kineze kanë pranuar se kishte raste që datojnë që nga nëntori, duke ngritur dyshime mbi transparencën e të dhënave zyrtare të bëra publike.

Studimi në Itali siguroi prova shtesë se virusi mund të jetë përhapur shumë më herët sesa mendohej fillimisht, duke qenë i pranishëm në të gjithë Evropën tashmë në vjeshtën e vitit 2019.

Studimi ndryshon në mënyrë thelbësore provat e mëparshme që raportuan rastin e parë zyrtar italian në fund të shkurtit 2020.

Shkencëtarët e Milanos identifikuan infeksionin COVID-19 në një tampon të marrë në fillim të dhjetorit 2019 nga një 4-vjeçar, i cili jetonte pranë Milanos dhe për herë të parë shfaqi një kollë dhe simptoma të tjera një muaj më parë.

Studiuesit vunë në dukje se fëmija zhvilloi simptoma të ftohjes dhe gripit në nëntor dhe më pas një skuqje të ngjashme me fruthin në fillim të dhjetorit. Mbetet ende e paqartë nëse ai infektoi anëtarët e tjerë të familjes.

Muajin e kaluar, një studim i veçantë i kryer në Itali sugjeroi se koronavirusi mund të jetë shaqur në vend që nga shtatori 2019.