Është ndarë nga jeta në moshën 85 vjeçare fituesi i Nobelit në ekonomi, profesori i makroekonomisë Robert Lucas.

Njoftimi është bërë nga Universiteti i Çikagos, ku ai filloi të jepte mësim si profesor në vitin 1975 dhe mbeti profesor deri në vdekjen e tij.

Në dhënien e çmimit Nobel në Ekonomi 1995 profesorit Lucas, laureatit të pestë të ekonomisë në Universitetin e Çikagos në gjashtë vjet, Akademia Mbretërore Suedeze e Shkencave e përshkroi atë si “ekonomistin që ka pasur ndikimin më të madh në kërkimin makroekonomik që nga viti 1970“.

Puna e tij, e cila u bë e njohur në mesin e viteve 1970, sfidoi konkluzionet e John Maynard Keynes në makroekonomi rreth efektivitetit të ndërhyrjes së qeverisë në çështjet ekonomike. Lucas sfidoi supozimet pas kurbës Phillips, të cilat mendohej se tregonin se një qeveri mund të zvogëlojë shkallën e papunësisë duke rritur inflacionin.

Lucas ndoqi Universitetin e Çikagos, duke fituar diploma në histori (AB, 1959) dhe ekonomi (Ph.D., 1964). Ai dha mësim në Universitetin Carnegie Mellon nga 1963 deri në 1974 përpara se të kthehej në Çikago për t’u bërë profesor i ekonomisë në 1975./abcnews.al