Gjermania nuk do të pranojë refugjatët e bllokuar në kufirin Bjellorusi-Poloni, tha të enjten Ministri i Brendshëm gjerman Horst Seehofer pas bisedimeve me homologun e tij polak.

“Nëse ne pranonim refugjatë, nëse do të përkuleshim para presionit dhe do të thoshim ‘po i çojmë refugjatët në vendet evropiane’, atëherë kjo do të nënkuptonte zbatimin e bazës së kësaj strategjie perfide”, tha Seehofer gjatë një konference për shtyp në Varshavë, transmeton arbresh.info

Vendet e Bashkimit Evropian akuzojnë Bjellorusinë se ka krijuar qëllimisht krizën duke sjellë emigrantë nga Lindja e Mesme dhe duke i shtyrë ata të përpiqen të kalojnë ilegalisht në Poloni dhe Lituani. Minsk i mohoi akuzat.

“Ne po flasim për një migrim të parregullt dhe perfid që po organizohet nga Bjellorusia me një farë mbështetjeje nga Rusia”, tha Seehofer. “Polakët nuk po ndjekin vetëm interesat e tyre. Ata po veprojnë gjithashtu në interes të të gjithë Bashkimit Evropian.”

Gjermania, ekonomia më e pasur e BE-së, besohet të jetë destinacioni i preferuar i shumë prej emigrantëve.

Autoritetet e Bjellorusisë pastruan të enjten kampet kryesore ku emigrantët ishin grumbulluar në kufirin me Poloninë, në atë që dukej të ishte një zhvillim i madh në një krizë që javët e fundit është shndërruar në një konfrontim Lindje-Perëndim.

Seehofer hodhi poshtë si “dezinformim” një raport nga agjencia e lajmeve Belta se presidenti i Bjellorusisë Alexander Lukashenko i kishte paraqitur Kancelares Angela Merkel një plan për të zgjidhur krizën që do të përfshinte marrjen e 2000 emigrantëve nga BE./reuters/arbresh.info/