Një karavan prej disa mijëra emigrantësh është nisur sot nga Meksika jugore drejt Shteteve të Bashkuara, ku edhe pritet të mbahet Samiti i Amerikës për të diskutuar çështjen e migracionit.

Grupi, i cili përfshin burra, gra dhe fëmijë nga Amerika Qendrore dhe Venezuela, u nis në shi nga Tapachula, në kufirin e Guatemalës, drejt kufirit të SHBA, më shumë se 3,000 km në veri, raportoi AFP, transmeton portal arbresh.info

Deri me tani nuk ka të dhëna të sakta për numrin e tyre.

“Emigrantët nuk janë kriminelë, por punëtorë”, shkruhej në pankartat e tyre.

“Ne po u themi presidentëve që po vijnë në samit sot se gratë dhe fëmijët emigrantë dhe familjet e emigrantëve nuk janë një mjet për të llogaritur” në “garancat ideologjike dhe politike,” i tha AFP Luis Garcia nga Dignificacion Humana, një OJQ që monitoron migrantët.

Presidenti demokrat Joe Biden shpreson se në Samit Amerika do të nënshkruajë një marrëveshje për bashkëpunimin rajonal në fushën e emigracionit, një temë e ndjeshme që ka shkaktuar kritika të ashpra nga opozita republikane.

Një nga partnerët kryesorë të Amerikës Latine, presidenti meksikan Andres Manuel Lopez Obrador, konfirmoi të hënën se ai nuk do të marrë pjesë në samit sepse Shtetet e Bashkuara nuk ftuan Kubën, Nikaraguan dhe Venezuelën sepse nuk respektojnë vlerat demokratike dhe të drejtat e njeriut.

Karvanët e emigrantëve që kalojnë përmes Meksikës kanë qenë shkaku i tensioneve me SHBA-në që nga mandati i presidentit amerikan Donald Trump (2017-2021).

Numri i njerëzve që duan të hyjnë në Shtetet e Bashkuara duke ikur nga varfëria dhe dhuna në Amerikën Qendrore dhe Haiti është në rritje të vazhdueshme prej muajsh./arbresh.info/