Në një letër të publikuar nga mediat franceze, presidenti francez, Emmanuel Macron premtoi se do të veprojë deri në maj 2027, data e përfundimit të mandatit të tij të dytë, edhe nëse kampi i tij politik e gjen veten të cenueshëm nga e djathta ekstreme, një javë para zgjedhjeve parlamentare.

Ky është një mohim i thashethemeve, të rinisura nga Marine Le Pen, për dorëheqjen e mundshme të kreut të Elysee përballë një situate krize politike.

“Mund të më besoni se do të veproj deri në maj 2027 si presidenti juaj, mbrojtësi në çdo moment të republikës sonë, vlerat tona, duke respektuar pluralizmin dhe zgjedhjet tuaja, në shërbimin tuaj dhe të kombit”, tha Macron në letër.

Ai këmbënguli se votimi i ardhshëm, me një raund të dytë më 7 korrik, nuk ishte “as zgjedhje presidenciale, as një votë besimi ndaj presidentit të republikës”, por një përgjigje për “një pyetje të vetme: kush duhet të qeverisë Francën?”

Macron pranoi se vendimi i tij për të thirrur zgjedhjet e parakohshme kishte krijuar për disa votues “zemërim” kundër tij.

“Qëllimi nuk mund të jetë thjesht të vazhdohet siç ishin gjërat. Kam dëgjuar se ju dëshironi ndryshim,” shtoi ai, duke vënë në dukje veçanërisht “përgjigjet shumë të forta” të administratës së tij mbi “pasigurinë dhe mosndëshkimin”./abcnews.al