Ministri i Jashtëm i Koresë së Veriut, Ri Son Gwon, ka refuzuar një ofertë nga Shtetet e Bashkuara për të zhvilluar negociata pa asnjë parakusht në lidhje me programin e armëve bërthamore të shtetit sekret.

“Ne nuk po shqyrtojmë as mundësinë e ndonjë kontakti me SHBA-të, e lëre më ta kemi atë, gjë që nuk do të na çonte askund”, citohet të ketë thënë ai në një deklaratë të mërkurën mbrëma.

Bisedime të tilla do të merrnin vetëm “kohë të çmuar”, u citua ministri i jashtëm të thoshte nga agjencia shtetërore KCNA.

Ndryshe, Kim Yo Jong, motra me ndikim e sundimtarit të Koresë së Veriut, Kim Jong Un, akuzoi të martën SHBA-të për pritje të rreme pasi i dërguari i saj i posaçëm në Korenë e Veriut kishte shfaqur përsëri mundësinë e bisedimeve pa parakushte gjatë një vizite në Seul të hënën.

Bisedimet midis Uashingtonit dhe Pyongyang nuk kanë bërë përparim që nga një samit i dështuar në Vietnam në vitin 2019 midis presidentit të atëhershëm të SHBA-ve, Donald Trump dhe Kim Jong Un.

Që kur presidenti i SHBA-së, Joe Biden mori detyrën, Koreja e Veriut duket se ka miratuar një qasje të “pritjes dhe të shikimit”.

Madje Kim tha javën e kaluar se vendi i tij i izoluar duhet të jetë “i përgatitur për dialog dhe konfrontim” me Shtetet e Bashkuara.

Koreja e Veriut e ka bërë të qartë disa herë që nga viti 2019 se nuk është e interesuar për bisedime të reja nëse Uashingtoni nuk paraqet propozime të reja. /Telegrafi/